Aqtóbeniń Alǵa aýdanyna 7 saǵattan soń jaryq berildi

AQTÓBE. QazAqparat – Alǵa aýdanynda elektr stansasy órtenip, tańerteń 8 myńǵa jýyq abonement jaryqsyz qaldy. Arada 7 saǵat ótkende elektr togy berildi, dep habarlaıdy QazAqparat tilshisi.

Alǵa aýdanynyń ortalyǵynda elektr stansasy órtenip, oqıǵa ornyna 18 qutqarýshy men 4 kólik jiberildi. Órt sóndirýshiler kóbik shashyp, stansa ishindegi 20 tonna maıdyń janyp ketpeýin qamtamasyz etken.

Órttiń jalpy aýdany 50 sharshy metrdi qurady. Keıin Alǵa qalasy men 7 aýyldyń jaryqsyz, sýsyz qalǵany belgili boldy. Jumys toby negizgi stansanyń janyndaǵy rezervtik trasformatordy qosýǵa kúsh saldy. Nátıjesinde arada 7 saǵattan astam ýaqyt ótkende qala men aýyldarǵa elektr togy berildi.

«Alǵa qalasyndaǵy transformator 1967 jyly qoldanysqa berilgen. Ony jyl saıyn tekserip, baqylaýdan ótkizip otyr. Órtten soń 7485 abonent, oǵan qosa 334 zańdy tulǵa jaryqsyz qaldy. Barlyǵy - 7819 abonent. Olar: Alǵa qalasy, Bestamaq, Besqospa, Toqmansaı, Tamdy, Qarabulaq, Saryhobda, Qarahobda aýyldyq okrýgteri», - dedi oblys ákimi apparaty basshysynyń orynbasary Erjan Baıtanaev.

Oblystyq energetıka jáne TÚKSh basqarmasy basshysynyń orynbasary Nurtaı Sertaevtiń aıtýynsha, jalpy 8 myńǵa jýyq abonent, ıaǵnı, 30 myń adam jaryqsyz qalǵan. Tek áleýmettik nysandarǵa generator shuǵyl qosyldy.