Aqtóbelikter Kórisý kúni «Qazaq halqyna myń alǵys» stelasyna jınaldy
Aqtóbe oblysy boıynsha búgin Kórisý kerýeni ótti. Munda ardagerler men jastar birigip, qaladaǵy turǵyn alaptaryna bardy. Onda Naýryz merekesiniń basy Kórisý kúniniń mán-maǵynasy túsindirildi.
- Búgin - jańa jyldyń bastaýy. Dástúrli merekemiz Kórisý kúni dep atalady. Bizdiń bala kezimizde osy kúnnen bastap úlkenderge sálem bere barý mindet bolatyn. Al aǵa urpaq bizdi kútip júretin. Bıyl Naýryz merekesi óte tııanaqty uıymdastyrlyp jatyr. Ár kúnniń óz mán-mańynasy bar. Biz tilimiz ben dástúrimizdi syılap, qurmettesek, ózgeler de qurmetpen qaraıdy,- dedi ardager ustaz Kamalhan Qýanuly.
Aqtóbe qalasyndaǵy Eset batyr turǵyn alabynda Kımeshek kerýeni ótti. Oǵan 100 áje qatysyp, qala kóshesimen júrip ótti.
- Kımeshek ájelerdiń ǵana emes, qazaq halqynyń ulttyq kıimi. Jas bosanǵan ananyń balasy qyrqynan shyqqannan keıin sol áýlettiń ájeleri arnaıy kımeshek tiktirip, kıgizgen. Qatarymyzǵa qosyldyń, sen de áýlettiń anasy bolasyń dep aıtqan. Tek kımeshektiń túsine qaraı ózgeshelegi bolady. Jas kelinshekter kımeshekti taqııamen birge kıgen. Al qarııalar aq kımeshek kıdi. Maǵynasy naǵyz ana bolý, kımeshekke laıyq adam bolý degendi bildiredi,- dedi Madına Dúısenqulova.
Al negizgi merekelik shara «Qazaq halqyna myń alǵys» stelasynda ótti. Onda teatrlandyrylǵan kórinis qoıylyp, qolóner sheberleri kórme uıymdastyrdy.
- Amal merekesiniń orny erekshe. Memleket basshysynyń tapsyrmasy boıynsha «Naýryznama» tujyrymdamasy bekidi. Bul salt-dástúrdi dáripteý, atadan balaǵa amanat bolǵan ulttyq ǵurypty jalǵastyrý bolyp esepteledi. Bul tatýlyq pen baýyrmaldyqtyń úlgisi. Bul naǵyz halyqtyq mereke. Tatý bolsaq, birlik nyǵaıa túsedi,- dedi Aqtóbe oblysynyń ákimi.
Aıta keteıik, oblysta 22-naýryzǵa deıin túrli tanymdyq, mádenı, aǵartýshylyq shara ótedi.