Aqtóbelik sharýalar shegirtke oshaqtary týraly ýaqtyly habarlap otyr
Aqtóbe oblysynda ıtalııalyq jáne azııalyq shegirtkeni ýlaý jumysy júrip jatyr.
Qazirgi kezde óńirde 784 myń gektardan astam aýmaq óńdelýi tıis bolsa, onyń 777 myń gektardan astamynda ıtalııalyq shegirtkege qarsy kúres jumysy júredi.
Bul jumysqa barlyǵy 105 tehnıka jumyldyrylady. Arasynda An-2 ushaǵy, deltaplan nemese asa jeńil ushaq, aerozoldy generator men ÝAZ avtokóligindegi jer ústi búrikkishteri bar.
Bıyl óńdeý jumystaryna qajetti ýly preparattar Aqtóbe oblysyna ýaqytyly jetkizilip, aýdandarǵa taratyldy. Shegirtke dernásilderi shyqqany týraly aqparat alǵan sátte ýlaý jumysyna merdigerler jiberiledi.
— Mamyr aıynda jumys bastaldy. Aldymen aýa raıy ystyq Shalqar, Yrǵyz, Oıyl, Baıǵanın aýdandarynda ýlaý jumysy bastalyp, jalǵasyp jatyr. Qazirgi kezde barlyq 12 aýdanda shegirtkeniń shyǵýy baıqaldy. Tıisti monıtorıng jumystary kezinde oshaqtarda hımııalyq óńdeý júrgizilip jatyr. Oblys boıynsha 317 myń gektardan astam aýmaqta óńdeý júrgizildi. Bul ıtalııalyq shegirtke shyǵýy múmkin aýmaqtyń 41% quraıdy. Negizi 777 myń gektardyń 306 myń gektary Áıteke bı aýdanynda ornalasqan. Bul oblystaǵy agrarlyq aýdan. Oblys boıynsha Áıteke bı aýdanynda shegirtke dernásilderi eń sońynan shyǵyp tur. Búginde aýdanda 18 myń gektardan astam aýmaq óńledip tur. Munda qajetti preparat pen 28 tehnıka bar. Jumys atqarylyp jatyr, — deıdi QR AShM Agroónerkásiptik keshendegi memlekettik ınspektsııa komıtetiniń Aqtóbe oblystyq aýmaqtyq ınspektsııasynyń basshysy Dastan Saǵyrov.
Úıirli shegirtkemen qatar óńirde saıaq shegirtkege qarsy óńdeý jumysy da júrgiziledi. Oblys boıynsha 46 myń gektardan astam jer saıaq shegirke júretin aýmaqqa jatady.
Búginde 23 myń gektar aýmaqta shegirtke oshaǵy anyqtalsa, sonyń 22 myń gektarǵa jýyǵynda hımııalyq óńdeý júrgizildi.
— Aqtóbe oblysy boıynsha 433 myń gektar jerde ıtalııalyq shegirtke dernásili anyqtaldy. Onyń ishinde 327 myń gektar jerdi ýlaýǵa jatady dep belgilendi. Jalpy oblys boıynsha dernásilder eń birinshi 3-mamyr kúni shyqty. Dernásil tórt tolqynmen shyqty. Olar: 3, 11, 17 jáne 22 mamyr kúnderi. Italııalyq shegirtke ushqan kezde jumyrtqasyn 5-8 sm tereńdikke salady. Aýa raıyna jáne topyraqqa baılanysty ártúrli ýaqytta shyǵady. Sol sebepti bizde 2-3 jasta hımııalyq óńdeý júrgiziledi, — dedi «Respýblıkalyq fıtosanıtarııalyq dıagnostıka jáne boljamdar ádistemelik ortalyǵy» Aqtóbe oblystyq fılıal basshysy Garıfýlla Jolaev.
Jergilikti atqarýshy organdardan 128 adam bólinip, olar monıtorıng jumysyna tartyldy. Sonymen birge Respýblıkalyq fıtosanıtarııalyq dıagnostıka jáne boljamdar ádistemelik ortalyǵynan 64 anyqtaýshy bólindi.
Qoǵam belsendileri men Aqtóbe fermerlik ortalyǵy, Aýyl sharýashylyǵy fermerleriniń qoǵamdastyǵy habar berip otyrady. Foto, vıdeo aqparat merdigerlerge jiberiledi.
Aıta keteıik, oblys boıynsha egin nemese jaıylym jerdiń jaramsyz bolyp qalý deregi tirkelmedi. Jalpy ýlaý jumystary aýa raıyna baılanysty jalǵasady. Ystyq bolyp, tez tarasa jumys kúsheıtiledi.
— Bizdiń kompanııa 26 jyldan berý ýlaý jumystarymen aınalysady. Bıyl biz saıaq shegirtkeni ýlaý jumystaryna jaýaptymyz. Bul 46 myń gektardan astam aýmaq. Onyń 22 myń gektaryn óńdeldi. Qobda, Hromtaý, Áıteke bı, Qarǵaly, Alǵa aýdandarynda jumys atqarylyp jatyr. Saıaq shegirtkeni ýlaý kezinde hımııalyq preparatty ózimiz satyp alamyz. Oǵan 30 mln teńge qarjy jumsaldy, — dedi «Aqtóbe qunarlylyq» JShS basshysy Edires Jıenqulov.
Eske salsaq, shegirtkeniń taralýyna qarsy is-qımyl jónindegi ortalyq jedel shtab otyrysynda vıtse-premer Serik Jumanǵarın óńirlerdegi jaǵdaı týraly baıandamalardy tyńdady.
Onda Aqtóbe oblysynyń Áıteke bı aýdanynda shegirtke dernásilderi kóbeıe bastaǵany aıtyldy.