Aqtóbelik oqýshy balalarǵa qaýip tónse habardar etetin qosymsha oılap tapty

<p>ASTANA. KAZINFORM &ndash; Aqtóbelik oqýshy qyz jasandy ıntellekt júıesin qoldana otyryp, oqýshylarǵa qaýip tóndiretini týraly quzyrly organdarǵa habarlaıtyn qosymsha oılap tapty. Bul Aqtóbe oblysy ákimdiginiń baspasóz qyzmetinen habarlady.</p>

U.Qulymbetov atyndaǵy №64 mekteptiń 10 synyp oqýshysy Tumar Smaǵul jasandy ıntellekttiń múmkindikterin zerttep, birqatar zertteýler júrgizip, mektep oqýshylaryna tónýi múmkin qaýip týraly quzyrly organdardy habardar etetin «NazarAI» qosymshasyn ázirledi.

«NazarAI» qosymshasy jasandy ıntellekt arqyly beınekamera materıaldaryn naqty ýaqyt rejıminde óńdeıdi, adamdy tanyp, onyń minez-qulqyn modeldeıdi jáne qaýipti jaǵdaılar týraly jedel habarlama jiberedi. Qosymshanyń birneshe qyzmeti bar, sonyń biri – mektep tabaldyryǵyn attaǵan oqýshynyń bet-beınesin taný jáne onyń ata-anasyna balanyń oqý ornyna qaı ýaqytta túskeni týraly avtomatty túrde habarlama jiberý. Habarlamada oqýshynyń aty-jóni men kelgen ýaqyty kórsetilip, fotosy jiberiledi», - dep habarlady ákimdiktiń baspasóz qyzmeti.

Qosymshanyń taǵy bir fýnktsııasy – qaýipti anyqtaý. Eger zardap shekken adam qaýip tóngen sátte eki qolyn kóterse, jasandy ıntellekt beınede adam minez-qulqynyń kompıýterlik modelin jasaıdy. JI kóterilgen qoldyń buryshynyń gradýstaryn paıdalanyp esepteýler jasaı otyryp, adamǵa qaýip tónip turǵanyn anyqtaıdy.

Qaýipti anyqtaǵannan keıin qosymsha adamnyń beınesin anyqtap, aqparatty ashyq Telegram arnasyna jiberedi. Bul Telegram arnasynda ishki ister organdarynyń arnaıy bólimi tirkelgen.

– Mektep oqýshysy ǵylymı jetekshisi Erbol Qýanyshulymen birge óz qosymshasyn ázirleýdi jalǵastyryp, onyń múmkindikterin taǵy da zerdeleıdi, - dep atap ótti ákimdik.