Aqtóbelik kásipker qum ústine qulpynaı ósire bastady

<p>Aqtóbe oblysy Shalqar aýdany Jyltyr aýylynda jas kásipker qum ústine jylyjaı salyp qoıdy. Bıyl qulpynaı ege bastady, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Jyltyr aýylynyń turǵyny kásipti qum ústinde bastaǵannyń óz qıyndyǵy bar ekenin aıtty.

Bir ǵana jylyjaı úshin áýeli jerdi tereńdigi 50 sm etip qazdy. Bir sátte qum boryp, qaıta basyp qalǵan.

Keıin kóliktiń emes, eki qoldyń kúshine senip, qaıta tazalady. Búginde 7 jańa jylyjaıy bar. Ekeýi qystyq, ózgesi jazdyq.

— Bıyl jazdyq jylyjaıǵa qulpynaıymyzdy egip qoıdyq. Kóktemde ónim alamyz dep josparlap otyrmyz. Bolashaqta qysy-jazy ósirgimiz keledi. Biz Eýropalyq elıtaly surpyn egip otyrmyz. Aýa raıyna qolaılysy tańdaldy. Jospar boıynsha básekelesterde ónim azaıǵanda biz jemis alamyz. Satý aımaǵymyz ózimizdiń Shalqar aýdany, aýyssa Aqtóbe qalasyna jiberemiz. Jylyna 4 tonna almaq oıymyzda bar. «Aýyl amanaty» jobasynyń qarjysy túgel ıgerildi. Aldaǵy ýaqytta tańqýraı da egýimiz múmkin, — dedi kásipker Serikbolsyn Jeksembaı.

Qazir baýyrlarymen birge ózi bar jumysty atqaryp otyr. Aldaǵy ýaqytta birneshe aýyldasyn qolastyna almaq nıette.

Foto: Altynaı Saǵyndyqova/Kazinform

Buǵan deıin 1200 sharshy metr jerdi ıgerse, jańa jylyjaılary 2500 sharshy metr aýmaqty alyp jatyr.

— Sońǵy jyldary aýyl sharýashylyǵyna basymdyq berilip keledi. Sol durys. Qazaqstanda aýyl sharýashylyǵy damýdyń negizgi draıveri. Bizdiń jerimiz bar, sýymyz bar. Bárin ıgerýmiz kerek. Meıli ol egin, meıli ol mal sharýashylyǵyna baǵyttalsa da. Biz aıyna 400-500 myń tg taýyp turmyz. Negizi jylyjaı degenimiz — lotereıa. Barlyǵy suraq. Jospar bar, biraq baǵany naryq retteıdi, — dedi jas kásipker.

Qum arasynda otyryp bıznes josparyn iske asyrǵan ol qıyndyqty jeńý úshin zertteý, saraptaý mańyzdy dep otyr.

— Jerdi qopsyta salý múmkin emes. Belgili bir bóligin qazyp, shyǵaryp tastaý kerek. Biz qazyp, Shalqardan topyraq ákeldik. Ózim agronommyn. Sonymen birge qurylysty da ózimiz júrgizdik. Olaı bolmasqa amal joq, ár qadam aqsha. Bir jylyjaıdyń ózine 500 myń suraıdy. Aqsha tarata bersem nem qalady, -dedi ol.

Bıyl 8-9 tonna qııar, 2 tonna qyzanaq aldy. Kelisi orta eseppen 300 tg boldy. Qysta 700 tg bolsa, jazda 100 tg bolady.

Kásipker «Jumyspen qamtý» baǵdarlamasy aıasynda 5 mln teńge aldy.

Foto: Altynaı Saǵyndyqova/Kazinform

Al «Aýyl amanaty» kezinde 18 mln teńgege jylyjaı sharýashylyǵyn keńeıtti.