Aqtóbelik fermerler et ótkizetin alań taýyp berýdi surady

<p>Aqtóbede mal, egin, sút sharýashylyǵymen aınalysatyn fermerler jınalyp, Aýyl sharýashylyǵy mınıstrligi, &laquo;Báıterek&raquo; UBH&raquo; AQ, &laquo;QazAgroQarjy&raquo; AQ men jergilikti ákimdik ókilderine usynystaryn aıtty. Olar jaıylym jer, sýbsıdııa, janar-jaǵarmaı quny, et ótkizý, tehnoparkti jańartý jolyn surap, Agrobank ashýdyń tetigin oılastyrýdy jón sanady, dep habarlaıdy Kazinform.</p>

Aqtóbe qalasyndaǵy Shyǵarmashylyq ortalyǵyna 200-ge jýyq sharýa jınalyp, Astanadan kelgen vedmostvo ókilderine birneshe usynysyn aıtty. Sharýalar qala mańynan ǵana emes, aýdan, aýyldardan arnaıy keldi.

- Meniń eki suraǵym bar. El zańnamasyna saı Qazaqstanda qurastyrylǵan aýyl sharýashylyǵy tehnıkasyna 30%, al shetelden ákelingen traktorlarǵa 15-25% sýbsıdııa qarastyrylǵan. Eger biz otandyq ónimdi qoldasaq, sapasyna mán berý kerek. Barlyq bólshekteri de elimizde shyǵarylsa deımiz. Sonymen birge sýarmaly egistik elimizdiń bolashaǵy. Bul baǵytta nesıe sharýalarǵa tikeleı berilgenin qalaımyz. Ózim de osy baǵytty tańdaǵan edim. Shynymdy aıtqanda tehnıka iske aspaı, tek nesıeni tólep otyrmyn. Jerasty sýlaryn da qoldanǵan durys, tek qar men jańbyr sýyn jınamaı,- dedi Aqtóbe oblysy Mártók aýdanynyń sharýasy Nurtaı Malaev. QR Aýyl sharýashylyǵy mınıstrliginiń sarapshysy bul jaǵdaıǵa qatysty óz pikirin bildirdi.

Foto: Kazinform/Altynaı Saǵyndyqova

- Sharýa tehnıkany ózi tańdaıdy. Sheteldiń bir tehnıkasyn alǵan tıimdi me, elimizde shyǵarylyp jatqan bir jarym, keıde eki tehnıkany alǵan tıimdi me? Suranys bar. Biz sýbsıdııany kótergen saıyn shetelden ákelinetin tehnıka baǵasynyń da ósip jatqanyn kórip otyrmyz. Aýyl sharýashylyǵy mınıstrligi bárin saralap otyr,- dedi QR Aýyl sharýashylyǵy mınıstrliginiń bas sarapshysy Maqsat Sadýov. «QazAqroQarjy» AQ-nyń ókili dıllerdi tirkeý quzyretine kirmeıtinin aıtty. Elimizde sharýalar eki jolmen tehnoparkin jańarta alady. Birinshi joly resmı dıller arqyly satyp alyp, «QazAqroQarjy» AQ-nan lızıng alý. Ózgesi ekinshi deńgeıdi bankten nesıe alyp, sharýa óz betimen ákele alady.

Foto: Kazinform/Altynaı Saǵyndyqova

Al sýbsıdııaǵa keler bolsaq, respýblıkada 155 mıllıard teńge aqsha tapshy.

- Bıyl ósimdik sharýashylyǵyna 30, mal sharýashylyǵyna 30 mlrd teńge bólindi. Taǵy 30 mlrd teńge ınvestsýbsıdııaǵa jumsalady. Sóıtip 90 mlrd teńgeni úkimet tarapynan bólip otyr. Qalǵan qarjy keler jyly beriledi. «Sýsıdııa ýaqytyly berilmeıdi, sharýalardy paıyzdyq ústemeaqysy ósip ketip tur. Sharýalarǵa 6% nesıe tikeleı berý» dep sharýalar aıtyp jatyr. Qazir bul másele qolǵa alynyp, saralanyp jatyr,- dedi QR Aýyl sharýashylyǵy mınıstrligi mal sharýashylyǵy departamenti dırektorynyń orynbasary Erlan Іlııasov. Sonymen birge aqtóbelik sharýalar et satý naryǵyn keńeıtýdi surady. Erlan Іlııasovtiń aıtýynsha, bul Astanada talqylaıtyn júıeli másele. Elimiz tek Ózbekstan naryǵyna jónelte alady, ózgesi túrli karantınge baılanysty ázirge toqtap tur.

Aıta keteıik, bıyl Aqtóbede aýyl sharýashylyǵy salasyn qoldaýǵa 14,5 mlrd.tg qarajat bólindi. Onyń ishinde mal sharýashylyǵy 6, ósimdik sharýashylyǵyna 1,5 mlrd, al aýyl sharýashylyǵy ónimderin qaıta óńdeýge 353 mln teńge qarastyryldy. Qarjylyq quraldarǵa 5,2 mlrd, basqa da baǵyttarǵa 1,4 mlrd teńge bólindi.