Aqtóbelik epıdemıologtar tumaý men menıngokokk ınfektsııasynan saq bolýǵa shaqyrdy

<p>AQTÓBE. KAZINFORM &mdash; Aqtóbe oblysynda bıyl 9 adamnan menıngokokk ınfektsııasy anyqtalyp, rastaldy. Epıdemıologtar 250 adamdy teksergenimen, kimniń vırýs taratyp júrgenin anyqtaı almaı otyr.</p>

Aqtóbede oblysynda qazan aıynan beri 133 adamnan pnevmonııa anyqtaldy. Sonymen birge menıngokokk ınfektsııasy da tirkelip jatyr.

— Óte qaýipti ınfektsııa 10-12 jyl saıyn qaıta órship turady. 2015 jyly 24 jaǵdaı tirkeldi. Sodan keıin tómendep, qalypty bolǵan edi. Arada on jylǵa jýyq ótip, qaıta anyqtalyp jatyr. Barlyǵy 9 jaǵdaı zerthanalyq tekseris kezinde dáleldendi. Onyń beseýi mektep, ekeýi balabaqsha balalary arasynda anyqtaldy. Byltyr bireýi ǵana tirkelgen eken. Bıyl naýqastarmen baılanysta bolǵan 250 adam tekserilgenimen, kimniń tanysymaldaýshy ekenin anyqtaý múmkin bolmady. Bul ınfektsııa naızaǵaı tárizdi tez damıdy. Birden qyzý kóteriledi, mı qabynady. Der kezinde emdelmese adam ólip qalýy múmkin. Qyzý kóterilip, bas aýyrsa, ózin álsiz sezinse, jaryqtan qoryqsa úıden em qabyldamaǵan jón, — dedi Aqtóbe oblystyq sanıtarııalyq-epıdemıologııalyq baqylaý departamenti basshysynyń orynbasary Muhtar Serbaev.

Sonymen birge óńirde bıyl 46 myńnan astam JRVI-den em qabyldaǵan. Onyń 68% paıyzdan astamy 14 jasqa deıingi balalar bolyp tur.

— Byltyrǵymen salystyrǵanda aýrýshańdyq kórsetkisi 1,3 esege artty. Mektep oqýshylary arasynda 2700-den astam jaǵdaı anyqtaldy. Kóbi Aqtóbe qalasynda tirkeldi. Sonymen birge tumaý vırýsyn anyqtaý maqsatynda 1118 synama alyndy, zertteldi. Eshqaısysy rastalmady, — dedi Aqtóbe oblystyq sanıtarııalyq-epıdemıologııalyq baqylaý departamenti basshysynyń orynbasary Muhtar Serbaev.

Aıta keteıik, Aqtóbede tumaýǵa qarsy 109 myńnan astam vaktsına satyp alyndy. Ony arnaıy esepte turǵan adamdardar, ıaǵnı, júkti áıelder, aýrýshań adamdar men medıtsına qyzmetkerleri qabyldaıdy.

Eske salsaq, Soltústik Qazaqstan oblysynda bir aptada jiti respıratorlyq vırýstyq ınfektsııa juqtyrǵandar sany 1,5 ese ósti.