Aqtóbelik áıel jol erejesin 119 ret buzyp, 3 mln teńge aıyppul arqalady

<p>AQTÓBE. KAZINFORM - Aqtóbede Lexus kóligiń 35 jastaǵy júrgizýshisi jol erejesin 119 ret buzyp, 3,3 mln teńge aıyppul arqalady. Kólik aıyp turaǵyna qoıyldy.</p>

Aqtóbe oblystyq PD Ákimshilik polıtsııa basqarmasy bastyǵynyń orynbasary Erkin Ótegennniń aıtýynsha, arnaıy baǵdarlamalyq keshenniń kómegimen 3 mıllıon teńge qaryzy bar Lexus avtokóligi anyqtaldy. Sheteldik esepte turǵan kólik ıesi polıtsııa taba almaıdy dep oılasa kerek, 119 ret ereje buzdy. Bul zańsyzdyq “Qorǵaý” júıesi arqyly anyqtalǵan.

- Jol erejesin buzýshy Aqtóbe qalasynyń 35 jastaǵy turǵyny ekeni belgili boldy. Ol jyldamdyq rejımin asyrǵan. Aıyppuldyń jalpy somasy 3 mıllıon 378 myń teńgeni qurady. Qazirgi ýaqytta kólik arnaıy avtoturaqqa qoıyldy. Joldardaǵy jaýapsyzdyq kóbinese qaıǵyly oqıǵalarǵa ákeledi. Júrgizýshiler bul týraly oılanýy kerek. Kóptegen sheteldik kólik júrgizýshileri jazadan qutylamyz dep úmittenedi, biraq olaı emes. Polıtsııa qyzmetkerleri mundaı júrgizýshilerdi taýyp, jaýapqa tartady,- dep habarlady Aqtóbe oblystyq PD Ákimshilik polıtsııa basqarmasy bastyǵynyń orynbasary Erkin Ótegen.

Aıta keteıik, oblys ortalyǵynyń kóshelerinde jol qozǵalysy erejelerin buzýdy tirkeıtin kameralar ornatylǵan. Jyl basynan beri kameralardyń kómegimen jyldamdyq rejımin asyrýdyń 77 myńnan astam faktisin tirkedi.