Aqtóbelik aýdıtorlar 18 mlrd teńgeniń qarjylyq buzýshylyqtaryn anyqtady

<p>AQTÓBE. KAZINFORM — Aqtóbede aýdıtorlar qarjynyń maqsatty jumsalý joly tekserdi. Nátıjesinde 17,9 mlrd teńgeniń buzýshylyǵy anyqtalyp, taýar jetkizý, qyzmet kórsetý, jumys oryndaý jáne býhgalterlik esep júrgizý esebinen qarjy bıýdjetke qaıtaryldy.</p>

Aqtóbe oblysy turǵyndary jáne kásipkerleriniń qatysýymen ótken onlaın kezdesýde QR Qarjy mınıstrligi ishki memlekettik aýdıt komıtetiniń tóraǵasy Erjan Myńjasarov óńirdegi buzýshylyqtardy tizbektep berdi.

Onyń aıtýynsha, bıyl Aqtóbe oblysynda 107 tekserý júrgizilgen. Onda qazynadaǵy 28,9 mlrd teńgeniń maqsatty jumsalýy tekserildi.

Aýdıtorlar 18 mlrd teńge somasynda qarjylyq buzýshylyqtardy anyqtaǵan.

Onyń ishinde 17,9 mlrd teńge taýar jetkizý, qyzmet kórsetý, jumys oryndaý jáne býhgalterlik esep júrgizý esebinen bıýdjetke qaıtaryldy. 

— Bizdiń mindetimiz — bıýdjet qarajatyn maqsatty paıdalanýdy qamtamasyz etý. ıAǵnı, bir de bir teńge tıimsiz jobalarǵa jumsalmaýy tıis, — dedi komıtettiń tóraǵasy Erjan Myńjasarov. 

E. Myńjasarov óńirlerdegi avtomobıl joldarynyń qurylysy tikeleı Prezıdenttiń qatań baqylaýynda ekenin jáne komıtettiń oblystarda jol qurylysy boıynsha baqylaý men tekserýler júrgizetinin atap ótti.

Mysaly, Batys Qazaqstan, Shyǵys Qazaqstan jáne Qaraǵandy oblystaryndaǵy tekserýler bul salada birqatar kemshilik pen buzýshylyqtardyń bar ekenin kórsetti. Tekserýler kóbine halyqtan túsken shaǵymdardyń negizinde júrgizilgen. 

Eske salsaq, aýdıtorlar Jaısań arnaıy bilim berý uıymynda qyzmetkerler jumys istemegen kúnderine de jalaqy alyp kelgenin anyqtady.

Al Muǵaljar aýdanynda ákimdik 5 aýyldy ınternetpen qamtý úshin aqshany aldyn ala bólip, jumys kesh iske asyrylǵan.