Aqtóbelik áskerı oqý ornynyń ushqyshtary jańa ushaqpen alǵashqy jattyǵýyn ótkizdi

<p><strong>AQTÓBE. KAZINFORM &ndash; Talǵat Bıgeldınov atyndaǵy Áýe qorǵanysy kúshteri áskerı ınstıtýtynyń &laquo;Aqtóbe&raquo; áýe aılaǵynda chehııalyq L-410 ushaqtarymen alǵashqy áskerı oqý-jattyǵý is-sharasy ótti.&nbsp;</strong></p>

Buǵan deıin atalǵan ınsıtýttyń nusqaýshylary Chehııada úsh aılyq oqý kýrsynan ótti. Olar onda Full flight simulator jattyǵý alańdarynda jattyǵyp, sertıfıkatpen marapattalyp, osy ushaq modelin paıdalanýǵa ruqsat alyp kelgen bolatyn. 

Іs-shara aldynda ushýǵa daıyndyq barysy týraly baıandama jasaldy. Sodan soń lenta qııý rásimi boldy. Ushý aldyndaǵy nusqaýlyqty alǵan soń chehııalyq nusqaýshy men qazaqstandyq áskerı ushqysh podpolkovnık Qanybek Shınbaev áýege kóterildi. 

– Ushaqtyń bul túri kýrsanttardy, ushqyshtar men áskerı-kóliktik avıatsııanyń ınjenerlik-tehnıkalyq quramyn oqytýǵa óte qolaıly. Áýe kemesi zamanaýı avıonıkamen, navıgatsııalyq júıemen jabdyqtalǵan, ushý turǵysynan kóptegen múmkindikke ıe, – dep atap ótti aǵa ushqysh (nusqaýshy) – ekıpaj komandıriniń kómekshisi kapıtan Tımýr Kalın. 

Esterińizge sala keteıik, áskerı-kóliktik avıatsııa mamandaryn oqytýǵa arnalǵan ushý apparattary ótken jyldyń jeltoqsan aıynda ınstıtýttyń balansyna kelip túsken bolatyn. Endi aldaǵy jaz aılarynda kýrsanttar jeńil ári qos motorly ushaqtar arqyly praktıkalyq daıyndyqtan ótýge múmkindik alady.