Aqtóbelik ardager sportshy mınıstrlikti sotqa berip, syıaqysyn óndirip aldy

<p>AQTÓBE. KAZINFORM &ndash; Byltyr álem chempıonatyna qatysqan ardager sportshy Bógejan Amanbaev birinshi jáne ekinshi oryndardy jeńip alǵanymen, oǵan syıaqy taǵaıyndalmaǵan. Bul sheshimge kelispegen ol mınıstrliti sotqa berdi.</p>

Іs Aqtóbe oblysynyń mamandandyrylǵan aýdanaralyq ákimshilik sotynda qaraldy. Gir sportynan QR halyqaralyq dárejedegi sport sheberi Bógejan Amanbaev Ózbekstannyń Hıva qalasynda ótken álem chempıonatyna qatysyp, 65-69 jas aralyǵyndaǵy ardagerler tobynda baq synady. Ol eki ret birinshi jáne bir ret ekinshi oryndy ıelendi. Osy úshin de syıaqy alýy tıis bolǵanymen, aqsha bólinbedi. Bul olqylyqty aıtqan Bógejan Amanbaev QR Týrızm jáne sport mınıstrligin sotqa berdi.

«Ereje boıynsha halyqaralyq jarystardyń chempıondary men júldegerlerine, jeke sport túrleri boıynsha qurama komandalardyń múshelerine ár sportshyǵa ár oryn úshin 100% mólsherinde aqshalaı kótermeleý tólenedi. Bul rette sport ardagerlerine, halyqaralyq jarystardyń júldegerlerine kótermeleý tóleýge tikeleı tyıym salynbaǵan. Talap qoıýshy 27 qurama komandanyń sportshylarymen qatar jarysqa qatysyp, QR úshin óner kórsetip, qatysýshy elderdiń jalpy medaldyq esebinde eskerilgen júldeli oryndarǵa ıe bolǵan. Sondyqtan jaýapkerdiń erejede aqshalaı syıaqyny tóleý ulttyq qurama komandasynyń múshelerine ǵana kózdelgeni jáne bıýdjette sport ardagerlerine aqshalaı syıaqy tóleý boıynsha shyǵystar kózdelmegeni týraly dálelderi dármensiz dep tanyldy. Talap qoıýshyǵa aqshalaı syıaqy tóleýden bas tartý úshin jaýapkerge negiz bolmaǵan. Sot ákimshilik talapty qanaǵattandyrdy. Mınıstrlik talap qoıýshyǵa álem chempıonatyndaǵy júldeli oryndar úshin aqshalaı syıaqy tóleýge mindetti,- dep jazylǵan Joǵary sot taratqan habarlamada.

Ardager sportshy Bógejan Amanbaev qazir osy sekildi birneshe talap aryzdy sotqa túsirgenin aıtty. Ol tek Hıvadaǵy chempıonat emes, ózge jarystardaǵy jeńisi úshin syıaqy almaǵan.

«Sot otyrysy kezinde mınıstrlik túrli dálel usynyp, syıaqy tóleýge qarsy boldy. Sonymen birge ardager sportshylardy qatarǵa alǵysy kelmeıdi. Ardagerler jastarǵa úlgi. Sony umytpaý kerek. Men ǵana emes, ózge sport túrleriniń ardagerleri de syıaqy ala almaı júr. Qazir Qazaqstanda osy másele jıi kóterile bastady», - dedi Bógejan Amanbaev.