Aqtóbelik analar sý tasqynynan aýyldy aman alyp qalǵan azamattarǵa qurmet kórsetti

<p>AQTÓBE. KAZINFORM &ndash; Aqtóbe oblysy Yrǵyz aýdany Quılys aýylynyń analary, kelinderi sý tasqyny kezinde bógetti bekitip, eki aı bel jazbaı jumys istegen áskerılerge, tótenshe jaǵdaılar qyzmetkerleri men er azamattarǵa qurmet kórsetti.</p>

Yrǵyz aýdany Quılys aýylynda sý tasqynyna qarsy kúres jumysy 4 sáýirden bastap júrdi. Al áskerıler Quılys jáne Jaısańbaı aýyldaryna 30-sáýir kúni jetip, áli kúnge deıin bógetti bekitý jumysyn júrgizip jatyr. 

- 30 sáýir kúni 46 adam shyqty. Sodan 20 sáýir kúni 20 áskerı qyzmetshini 20 áskerı qyzmetshi aýystyrdy. Arasynan qalaǵa kelip, qaýyrt sharýasyn retteýi tıis qyzmetkerler tańdaldy. Al 21 mamyr kúni taǵy 15 adamdy jiberdik. 28 maýsymda sol 15 adamnyń ornyna 15 qyzmetshi Aqtóbe qalasyna keldi. Ol kezde de aýylǵa birinshi barǵandar arasynda irikteý júrdi. Qazir jaǵdaı turaqty. Yrǵyz aýdanynyń ákimi apta sońyna qaraı aýylǵa baryp, sý deńgeıin, bógettiń jaǵdaıyn qarap, sheshimin aıtady. Qazir ol jaqta 46 áskerı qyzmetshi bar. Bári mektepte ornalasqan. As-sýy jergilikti meıramhanada beriledi, - dedi QR TJM 20982 áskerı bólimi komandıriniń Tárbıe jáne áleýmettik quqyqtyq jumystar jónindegi orynbasary Jasulan Óteýov. 

- Aýdan ákimi kelip, sheshimdi birlese shyǵaramyz. Qazir sý kelý qarqyny basyldy. Kúnine 2-3 sm tómen túsip jatyr. Búginge deıin 25 sm tústi. 1 maýsymnan bastap qarttar, múgedekter, áıelder men balalar aýylǵa keldi. Aýylda bóget salý jumysy tolyq bitti. Qatty daýyl kúnderi tolqynmen shaıyp, qulatqan bólikteri qaıta bekitilip, qalpyna keltirildi. Búgin bul jumys aıaqtaldy, - dedi Táýip aýyldyq okrýginiń ákimi Kamal Tileýjanov.

Aýyl ákimi buǵan deıin 3 áskerı qyzmetkerdiń eńbegin baǵalap, 3 alǵys hat berdi. Erteń taǵy 15 qyzmetkerge rızashylyǵyn bildirmek. Al búgin aýyldaǵy analar dastarhan jaıyp, alǵysyn bildirdi. 

- Quılys aýylynan adamdar 14-19 sáýir aralyǵynda kóshirdi. Aldymen naýqas adamdar, kópbalaly otbasylar aýdan ortalyǵyndaǵy evakýatsııalyq pýnktke ornalastyq. Tamaǵymyzdy ýaqytyly berdi. Ózim muǵalimmin. Oqý protsesi toqtamady. Al er adamdar eki aı boıy kún-tún demeı bóget saldy. Daýyl kezinde bóget birneshe ret buzylyp, ábigerge salǵany ras. Qıyndyqtyń bári artta qaldy. Aýyl qalypty, balalarymyz kóshede asyr salyp júr. Azamattarymyzdy, oshaǵymyzdy aman-saý kórdik. Muny aıtyp jetkizý múmkin emes. Búgin aýyldyń analarynan atynan alǵysymyzdy bildireıik dep dastarhan jaıdyq. Elimizge aman-saý oralǵanymyzǵa shúkir deımiz, - dedi Quılys aýylynyń turǵyny, muǵalim Meıramgúl Sataeva. 

Eske salsaq, Quılys aýylynda myńdaǵan qapqa qum salynyp, bóget eki aı boıy bekitildi.

Munda daýyldy kúni jaǵdaı qıyndap, aýyldyń er azamattary, áskerıler men tótenshe jaǵdaılar qyzmetkerleri túnde de jumys istedi.