Aqtóbelikter zańsyz munaı tasymalynda polıtsııanyń qalaı kómekteskeni týraly aıtty
Aqtóbe oblystyq qylmystyq ister jónindegi mamandandyrylǵan aýdanaralyq sotynda Erkin Іzbasar, Aýhat Qalıev bastaǵan uıymdasqan qylmystyq topqa qatysty sot otyrysy jalǵasyp jatyr. Búgin qujatsyz, ruqsatsyz munaı tasymaldaǵandar jaýap berdi.
Kýáger Baǵlan Úmbetov eki KamAZ avtokóligimen Aşykól men Keńqııaqtan munaı tasymaldaǵanyn jasyrmady. Júrgizýshilerge qyzmeti úshin 20 myń teńgeden tólep otyrǵan. Sonymen qatar, júrgizýshiniń birin ózi, al ekinshisin sottalýshy Saıasat Úmbetov tanystyryp, jumysqa aralastyrǵan. Olar munaıdyń ár lıtrin 20 teńgege satyp alyp, 30 teńgege ótkizgen. Jaýap berý kezinde esh qujat bolmaǵanyn, jolda quqyq qorǵaýshylardyń ózderi kómekteskenin jasyrmady.
«1,5 mıllıon teńgeni jolda kómektesý, qaýipsizdik úshin tóledim. Saıasat Dúsipov maǵan Ráke Sábıtovıch degen qoldaýshy bar ekenin jáne oǵan tóleý qajet ekenin aıtty. Biraq sońynda 650 myń teńge berejaq boldym. Sóıtip jumysty toqtatýyma týra keldi. Birde Aqtóbe qalasyndaǵy 41 razezde polıtsııa ustap aldy. Maǵan júrgizýshi habarlasty, men Saıasat Dúsipovke habarlastym. Bizde qujat bolmady. Bir saǵat ishinde júrgizýshilerdi shyǵaryp jiberdi. Qujatsyz munaı tasymaldadyq. Biz munaıdy Keńqııaq aýylynan Nurlan degen adamnan aldyq»,- dedi Baǵlan Úmbetov.
Іs materıalyna súıensek, Baǵlan Úmbetov Aşykólden munaı tasymaldaý úshin Qaıyrkeldi Іzturǵanovpen tanysqanyn, odan eki ret munaı alǵanyn jetkizdi. Biraq shıki munaı birde sý, birde qaldyq bolyp shyqqan. Keıin bul joldy toqtatyp, munaıdy Keńqııaqtan alýǵa kóshken.
Aıta keteıik, Baǵlan Úmbetov buǵan deıin zańsyz munaı tasymaldaǵany úshin 3 jyl 9 aıǵa sottalǵan bolatyn. Qazir ol jazasyn ótep otyr. Qorǵaýshylar men memlekettik aıyptalýshylardyń, sottalýshylardyń tolassyz suraǵynan soń Baǵlan Úmbetov jaýap berýden bas tartyp, sýdıa Amanǵalı Moldaǵalıev tergeý kezinde odan alynǵan jaýapty oqyp berdi.
Eske salsaq, Aqtóbede reıderlik jolmen tartyp alý, zańsyz munaı tasymaldaý, satý, qylmystyq top qurý sekildi birneshe bap boıynsha is qaralyp jatyr. Іs boıynsha barlyǵy 26 aıyptalýshy bar. Olar: Adaıbek Sarsenov, Nurbolat Qaıyrbaev, Aıbek Tileýǵazıev, Aýhat Qalıev, Muhanbet Shavletov, Erkin Іzbasar, Bolatbek Beketov, Jandos Aqmaǵambetov, Jangeldi Ótegenov, Rýslan Dermuhanov, Amandos Esenǵalıev, Bekjan Qultaev, Nurlan Noǵaev, Saıasat Dúsipov, Súleımen Súgirbaev, Murat Turjanov, Sergeı Savchenko, Birjan Amanqulov, Erbol Tektiǵulov, Qaıyrkeldi Іzturǵanov, Nurlybek Tontaev, Janat Tektiǵulov, Kádirjan Pangereıuly, Murat Qýanyshev, Rahat Ahanov, Qartjan Qaldymurat.