Aqtóbelikter Túrkııaǵa ushaqpen gýmanıtarlyq kómek jiberdi

AQTÓBE. QazAqparat - Aqtóbelik kásipkerler men túrǵyndardan jınalǵan azyq-túlik jáne kıim-keshek, tósek oryn jabdyqtary Túrkııa eline jiberildi. Gýmanıtarlyq kómek ushaqpen jóneltildi, dep habarlaıdy QazAqparat tilshisi.

Joıqyn zilzaladan zardap shekken Túrkııa halqyna óńirden 11 tonnaǵa jýyq alǵashqy gýmanıtarlyq kómek jiberildi. Júktiń jalpy quny 30 mıllıon teńgeni quraıdy.

Aqtóbe oblysy ákiminiń baspasóz qyzmetiniń habarlaýynsha, Álııa Moldaǵulova atyndaǵy Aqtóbe halyqaralyq áýejaıynan tıelgen júk Túrkııanyń «MNG» áýe kompanııasynyń ushaǵymen Ystanbulǵa jóneltildi. Gýmanıtarlyq júkte asa qajetti jyly kıim-keshek, azyq-túlik, balalarǵa arnalǵan taǵamdar, tósek-oryn jabdyqtary, turmystyq jáne jeke gıgıenalyq zattar bar. «Qaıyrymdylyq sharasyna Aqtóbe oblysynyń turǵyndary men volonterleri men iri kásipkerlik sýbektileri úles qosty. Barlyq taýardy jınaý, qaptaý jumystary qalalyq Dostyq úıinde uıymdastyryldy.

«Aldaǵy aptada Túrkııaǵa Túrkistan, Mańǵystaý oblystary men Shymkent qalasynan gýmanıtarlyq kómek kórsetiledi. Júk Aqtóbe qalasynyń Álııa Moldaǵulova atyndaǵy halyqaralyq áýejaıy arqyly jóneltiledi. Oblys ákimdigi Túrkııa Respýblıkasynyń Úkimeti men halqyna kóńil aıta otyryp, qoldaý kórsetýdi jalǵastyrady»,- dedi oblys ákiminiń baspasóz qyzmeti.

Eske salsaq, qazaqstandyqtar Túrkııa halqyna kómek retinde 100-ge jýyq kıiz úı jiberedi.

Kaspi.kz qosymshasy arqyly Túrkııada zardap shekkenderge qarajat aýdarýǵa bolady.

Túrkııadaǵy alapat zilzala 6 aqpan kúni Túrkııanyń Kahramanmarash-Pazardjık aýdanynda 7,7 ball qýatymen jáne Elbıstanda 7,6 ball qýatymen bastalǵan edi.

Jer silkingennen keıin artynan 648 aftershok bolǵan.

Jerasty dúmpýi eldiń 10 provıntsııasynda, sondaı-aq kórshiles elderde, sonyń ishinde Sırııada sezildi.

Sońǵy málimet boıynsha Túrkııada zilzaladan kóz jumǵan sany 30 myńǵa jýyqtady.