Aqtóbelikter «Nur Otan» praımerızine belsendi qatysyp jatyr

AQTÓBE. QazAqparat - Aqtóbe oblysynda eki kún ishinde partııaishilik saılaýǵa qatysýǵa 167 adam nıet bildirgen. Olardyń arasynda múmkindigi shekteýli jandar men qandastarymyz da bar, dep habarlaıdy QazAqparat tilshisi.

Úmitkerler arasynda názik jandylar men jastardyń da talaby joǵary. Bul málimetterdi búgin partııanyń oblystyq fılıaly tóraǵasynyń birinshi orynbasary Erbol Danaǵulov brıfıngte málimdedi. Qujat qabyldaýdyń alǵashqy kúnderi Aqtóbe qalasy men Alǵa, Muǵaljar, Qarǵaly aýdandarynyń turǵyndary belsendilik tanytqan. Tirkelgenderdiń 78-i áıel, 89-y er azamat. 53 úmitkerdiń jasy 35-ke jetpegen. 48-i partııalyq bastaýysh partııa uıymdarynan usynylsa, 119 adam óz erkimen qatysyp otyr.
«Praımerız - partııaishilik saılaý. Onyń maqsaty – Parlament Májilisindegi jáne máslıhattaǵy tıimdi depýtattyq korpýsty odan ári qalyptastyrý, partııalyq jeli boıynsha ilgeriletý, olardy memlekettik organdardaǵy laýazymdarǵa usyný úshin básekelestik kúres negizinde myqty kóshbasshylardy anyqtaý», - dedi Erbol Danaǵulov.

Onyń aıtýynsha, osy saıası naýqandy ótkizý boıynsha Aqtóbe oblysy fılıalynyń qadamdyq jospary ázirlengen. Ol 5 negizgi kezeńnen turatyn is-sharalardy qamtıdy. Osy qadamdyq jospar boıynsha oblysta 25 debat uıymdastyrylady. Ol 3 deńgeıde, ıaǵnı, úgit-nasıhat barysynda, partııanyń aýdandyq, qalalyq jáne oblystyq fılıaldarynyń konferentsııasynda ótedi. Barlyq kandıdattyń debattarǵa qatysýy qajet.
1-3 qazan aralyǵynda oblystaǵy 33 myńnan astam partııa múshesiniń daýys berýi úshin 136 daýys berý ýchaskeleri belgilendi. Internetke qosylmaǵan 42 ýchaskede dástúrli, 94 ýchaskede onlaın daýys berý josparlanyp otyr.