Aqtóbelikter qaladaǵy jaǵymsyz ıisten qashan arylady – ákim jaýaby

NUR-SULTAN. QazAqparat – Aqtóbede aýany lastaǵan 20-ǵa jýyq mekeme anyqtaldy. Bul týraly Aqtóbe oblysynyń ákimi Ońdasyn Orazalın málim etti, dep habarlaıdy QazAqparat tilshisi.

«Biz taldaý júrgizdik. Nátıjesinde aýaǵa taraǵan qolańsa ıistiń shyǵýyna sebepshi 20-ǵa jýyq kásiporyn anyqtaldy. Sonyń ishinde káriz jelilerine jaýapty «Aqtobe su-energy» mekemesi men Aqtóbe ferroqorytpa zaýyty bar. Zaýyt aldaǵy 2-3 jylda sharalar qabyldap, jobasyn iske asyrady. Sonymen qatar bankterden nesıe alyp, káriz jelilerin jańartamyz. Degenmen, bul jumystarmen shektelip jatqanymyz joq. Byltyrdan bastap hımııalyq reagent, bakterııa alyp, káriz júıesine quıyp qolańsa ıisti azaıtýǵa tyrystyq. Árıne tolyq joıyldy dep aıta almaımyn. Byltyr jáne bıylǵy jaǵdaı táýirleý», - dedi óńir basshysy.

Sondaı-aq Ońdasyn Orazalın aýylsharýashylyq jerlerine zııan keltirip jatqan kóbelek qurtymen kúres sharalary týraly aıtty.

«Aýyl sharýashylyǵy mınıstrligi tıisti zańdarǵa ózgeris engizdi. Soǵan sáıkes, zııankesterdi ýlaý úshin qarajat jergilikti atqarý organdarynan bólinedi. Bul jumystarmen aınalysatyn 4 merdiger mekeme bekitildi. Degenmen munyń ekinshi jaǵy bar. Ótken jyly ý shashqannan keıin qaladaǵy qustar joq bolyp ketti. Bir jaqsylyqtyń bir jamandyǵy bolady», - dep atap ótti Ońdasyn Orazalın.

Aqtóbe oblysynyń ákimi ázirlengen josparǵa sáıkes ekologııa máselelerin sheshý jaqyn arada bastalatynyn atap ótti.