Aqtóbelikter Elbasyna qalany aglomeratsııalyq ortalyqqa aınaldyrý úshin aıanbaı eńbek etetinderine ýáde berdi

ASTANA. QazAqparat - Aqtóbe oblysy jurtshylyǵynyń ókilderi Memleket basshysyna hat joldady, dep habarlaıdy Aqordanyń baspasóz qyzmeti.

Avtorlar óz hatynda ótip bara jatqan jyly óńirde qol jetkizilgen oń nátıjeler týraly baıandaǵan.

Atap aıtqanda, olar «Jezqazǵan-Beıneý» temirjol jelisin iske qosýdyń ekonomıkalyq paıdasyna toqtalǵan.

«Osy joldyń boıynda ornalasqan 14 pýnkte júzdegen jumys orny ashylyp, jańa áleýmettik nysandar salynýda. Bul ekonomıkalyq kórsetkishterdi kúrt kóterip qoımaı, alys eldi mekenderdegi turǵyndardyń ómirin jaqsarta túsedi», - dep jazady avtorlar.

Jurtshylyq ókilderi respýblıkalyq, sondaı-aq halyqaralyq mańyzdaǵy birqatar jobalardyń da júzege asyrylǵanyna nazar aýdarady. Olardyń qatarynda Jańajol gaz óńdeý zaýyty, Aqtóbe rels-arqalyq zaýyty, «Qazhrom» TUK» AQ Aqtóbedegi jańa ferroqorytpa zaýyty bar. Osy jobalardyń qunynyń ózi 2,5 mıllıard dollardan asqan.

Avtorlar turǵyn úı-kommýnaldyq sharýashylyǵyn jańǵyrtý salasynda júzege asyrylyp jatqan baǵdarlamalardyń da nátıjelerine toqtalǵan.

«Oblys turǵyndarynyń 91,3 paıyzy sapaly aýyz sýmen qamtamasyz etilip, Aqtóbe qalasynyń jáne Alǵa, Shalqar, Qandyaǵash, Badamsha sekildi aýdan ortalyqtarynyń jylýmen qamtamasyz etý júıesi jańartyldy», - delingen hatta.

Sonymen qatar hatta eldi mekenderdi gazdandyrýdyń mańyzyn, sondaı-aq «Batys Eýropa - Batys Qytaı» kólik dálizi men qurylysy josparlanǵan «Astana - Aqtóbe - Atyraý» avtomagıstraliniń óńir ekonomıkasyn budan ári damytýda alatyn aıryqsha róli atap ótilgen.

Sońynda hat avtorlary Memleket basshysyna óńirge udaıy kóńil bólip otyratyny úshin alǵys aıtyp, Aqtóbeni aglomeratsııalyq ortalyqqa aınaldyrý jónindegi jaýapkershiligi zor mindetti júzege asyrý úshin aıanbaı eńbek etetinderin jetkizgen.