Aqtóbelikter 101-atqyshtar brıgadasynan tiri qalǵan jalǵyz ardagerdi quttyqtady

AQTÓBE. QazAqparat – 101-atqyshtar brıgadasynyń jaýyngeri Satylǵan Bekmaǵambetov bıyl Jeńis merekesinde quttyqtap kelýshilerdi aq batasymen qarsy aldy. Ǵasyr jasaǵan qart qarýlastary arasynan ózi ǵana tiri qalǵan, dep habarlaıdy QazAqparat tilshisi.

Satylǵan Bekmaǵambetov 1921 jyly Oıyl aýdanynyń Saraljyn aýylynda dúnıege kelgen.

Ol Qobda aýdanyndaǵy Jırenqopa aýylyndaǵy mektepte oqyp, zootehnık mamandyǵyn da alyp úlgerdi. Al 1941 jyly maıdanǵa shaqyryldy.

Birden oqý-jattyǵýǵa qatysyp, 1942 jyly 101-atqyshtar brıgadasy quramynda shaıqasqa tústi. Tarıhqa súıensek, 101-atqyshtar brıgadasy Aqtóbede jasaqtaldy.

Oǵan Aqtóbe, Batys Qazaqstan, Atyraý men Qyzylorda oblystarynan shaqyrylǵandar kirdi.

4 myńǵa jýyq jaýyngeri men komandır, 16 júk, 6 jeńil kóligi men 460 at da osy brıgadanyń enshisinde boldy.

Satylǵan Bekmaǵambetov sol maıdangerler arasynda tiri qalǵan jalǵyz ardager. Ol Máskeý, Rjev, Smolensk túbindegi qandy shaıqastarda aman qaldy, eki ret jaralandy.

Tutqynǵa tústi, qashyp shyǵyp, áskerge qaıta qosyldy.

«Bir apta boıy ákemdi Jeńis kúnimen quttyqtap kelip jatyr. Ózi soǵys jyldary týraly aıtpaıdy. Sebebi «qupııa saqtaý» týraly jarlyqqa qol qoıǵan eken. Al jeńisti Kenıgsbergte qarsy alǵan. Ákem 8 balasynan 16 nemere, 21 shóberemen qatar shópshegin de kórdi», - deıdi Satylǵan Bekmaǵambetovtiń balasy Maqsut Ismaǵulov.

Sonymen berge oblystyq máslıhat hatshysy Amangeldi Nýgmanov soǵys ardageri Mıhaıl Dıdenkony da quttyqtady.

Ardager turatyn kópqabatty úıdiń aldynda áskerı orkestr soǵys jyldaryndaǵy ánderdi oryndady. Mıhaıl Dıdenko óz rızashylyǵyn bildirdi.