Aqtóbelik jumysqa ornalasý úshin 1 mln teńge berip, aldanyp qaldy

AQTÓBE. QazAqparat - Aqtóbe oblysynda alaıaqtyq boıynsha jyl basynan beri 900-ge jýyq is tirkelse, onyń jartysyna jýyǵy ınternetke qatysty, dep habarlaıdy QazAqparat tilshisi.

Satyp alý, satý kezinde aldanyp qalýshylar sany kún sanap artyp keledi. Bıyl 896 is tirkelse, onyń 301-i ınternette qyzmet alý kezinde tirkelgen.

«Qala turǵyny maýsym-shilde aıynda elordalyqqa 1 mıllıon teńge aýdaryp jibergen. Ol osy arqyly jumysqa ornalaspaq boldy. Aqshany ekinshi deńgeıli banktiń mobıldi qosymshasy arqyly aýdarǵan eken. Dál osyndaı mysal kóp. Máselen, sayda.halykka.komek paraqshasyna bir turǵyn 35 900 teńge aýdaryp jibergen. Jarnamada aqshany eki eselep alýǵa bolatyny aıtylǵan. Munyń bári jalǵan habarlama», - dedi oblystyq PD baspasóz qyzmeti.

Taǵy bir turǵyn Telegram, WhatsApp messendjeri arqyly qor bırjasyna ınvestıtsııa salyp, aqshany eseleý úshin 1,5 mıllıon teńge aýdaryp jibergen. Jábirlenýshi ár kezeńde 500 myń teńgeden salyp otyrǵan. Qazir osy iske qatysty Qylmystyq kodekstiń «Alaıaqtyq» baby boıynsha is qozǵaldy.