Aqtóbelik jastar saılaýda belsendi bolýǵa úndedi
Aqtóbe oblystyq jastar saıasaty basqarmasy men Marat Ospanov atyndaǵy Batys Qazaqstan memlekettik medıtsnalyq ýnıversıteti birigip, jastarǵa saılaýǵa qatysyp, azamattyq paryzyn óteýge shaqyrdy. Búgin joǵary oqý ornynda stýdentterdiń qatysýymen «Saılaý ótkizýdiń mańyzdylyǵy» taqyrybynda dóńgelek ústel uıymdastyryldy. Oǵan bolashaq dárigerler qatysty.
«Saılaýdyń mańyzy men saıası-áleýmettik tusy, kandıdattar arasyndaǵy saıası jarnamalardyń zańdylyǵy, saılaýshylardyń tańdaýǵa qatysýy týraly aıtyldy. Medıtsınalyq ýnıversıtette saıasattaný, áleýmettaný pánderi bar. Onda saılaý júıesi, saılaý quqyǵy degen taqyryptar qamtylady. Bul joly jastardyń belsendiligin arttyryp, olardy óz tańdaýyn jasaýǵa shaqyryp otyrmyz. Máselen, AQSh-ta «kandıdatqa daýys berýge emes, óz taǵdyrymyzdy sheshýge baramyz» degen jaýapkershilikti sezinedi. Bizdiń qazaqstandyqtar da nemquraılyqpen qaramaı, qaýeset sózge ermeı, barynsha qatysyp, saılaýdy ádil ótkizýge ózi úles qosýy tıis», - dedi Marat Ospanov atyndaǵy Batys Qazaqstan memlekettik medıtsınalyq ýnıversıteti qoǵamdyq-gýmanıtarlyq pánder kafedrasynyń aǵa oqytýshysy Bekzat Moldın.
Dóńgelek ústelge stýdenttermen qatar oqytýshylar da qatysty. Aldaǵy ýaqytta da oqytýshylar jastarǵa saılaýdyń mańyzdylyǵy týraly aıtylyp, belsendilik tanytýǵa shaqyryp otyratyn bolady. Sebebi 9 - maýsymda stýdentter áli da sabaq oqyp, emtıhan tapsyrady.
«Bıyl 18-ge toldym. Sondyqtan birinshi ret saılaýǵa qatysyp, óz tańdaýymdy jasaımyn. Aldyn ala kandıdattar týraly aqparat jınap, olardyń atqarǵan isteri me aldaǵy josparlary, qolǵa alǵan jumysy týraly naqty bilemin. Árbir adamnyń daýysy mańyzdy. Ózim 9 mamyr kúni 1-kýrstyń sońǵy emtıhanyn tapsyryp, tańdaý jasaýǵa baramyn», - dedi stýdent Asyltas Seıilhan.