Aqtóbelik jas dızaıner Túrkııada ótken festıvalde bas júldeni jeńip aldy

AQTÓBE. QazAqparat - Aqtóbelik dızaıner Sábına Janzaqova Túrkııada ótken festıval kezinde ulttyq kıim úlgilerin sahnaǵa alyp shyǵyp, bas júldeni jeńip aldy, dep habarlaıdy QazAqparat tilshisi.

Sábına Janzaqova tek ulttyq naqyshtaǵy kıim úlgilerin tigip, sheteldik baıqaýlarǵa, festıvalderge qatysyp júr. Qazaqtyń salt-dástúri men ulttyq ereksheligin tanytýǵa úles qosyp júrgen jas sánger bul joly Túrkııanyń Kemer qalasynda ótken balalar jáne jasóspirimder shyǵarmashylyǵynyń halyqaralyq festıvalinde top jardy. Barlyǵy 15 elden 25 shyǵarmashylyq ujym qatysqan festıvalde Aqtóbe bas júldeni jeńip aldy.

«Balalar men jasóspirimderge arnalǵan ulttyq kıimdi tigý úshin 2-3 aı ýaqyt ketti. Men úshin bárinen ulttyq kıimderimizdi sheteldikterge tanystyrý mańyzdy. Sebebi, ózge elge barǵanda qazaqty tanytatyn, onyń ereksheligin pash etetin kıimimiz, ónerimiz. «Kúnkeı» de osy baǵytty nyq ustanyp, Túrkııada ulttyq kıimdi damytýǵa qosqan úlesimiz jáne bıde «Soǵyssyz álem» qoıylymyn sheber oryndaǵanymyz úshin dıplommen marapattaldy. «Naýryz» atty defıle gran-prıdi ıelenip, ІІІ halyqaralyq festıvaldiń basty syıy Aqtóbege buıyrdy. Bizdi sahnaǵa shyǵaryp, ulttyq kıim týraly jan-jaqty surady. Qaı ulttyq kıimdi qaı ýaqytta kııýge bolatyny da qyzyqtyrdy»,- dedi jas sánger Sábına Janzaqova.