Aqtóbelik taýar óndirýshiler munaı kompanııasyna ónimderin usynýǵa múmkindik aldy
Aqtóbede «Qazaqstandyq úlesti arttyrý: ózara áriptestik pen seriktestik» atty iskerlik forýmy ótip jatyr. Qazaqstandyq taýar óndirýshiler iri munaı kompanııasyna óz ónimderin usyndy.
«Biz munaı qyzdyratyn pesh, munaı-gaz operatorlaryn daıyndaımyz. Qural-jabdyqtardyń bári shetelden ákelingenimen, shıkizatty Qazaqstan kompanııalarynan alyp otyrmyz. 2016 jyly ashylyp, qazirgi kezde jergilikti munaı kompanııalarynyń tapsyrysyn oryndap otyrmyz. Aldaǵy ýaqytta aýqymdy tapsyrystar oryndaýdy maqsat etip otyrmyz»,- dedi «EkoEkspress Aqtóbe» JShS-niń bólim basshysy Aıbek Óteýov.
«SNPS-Aqtóbe» AQ qazaqstandyq úleske basymdyq bergenimen, keıde usynys az bolady. Máselen, jumys pen qyzmettegi qazaqstandyq úles 85 paıyzdy qurasa, taýardaǵy qazaqstandyq úles bar bolǵany 16-18 paıyz bolyp tur.
«Jyl ótken saıyn qazaqstandyq úlesti arttyrýǵa basymdyq beriledi. Eger munaı salasyna qajetti taýarlar jergilikti jerde, Qazaqstanda shyqsa, ımport azaıady. Máselen, buǵan deıin burǵylaý jumystaryna qajetti tsement tek shetelden ákelindi. Al qazir Shymkentte shyǵarylyp, tapsyrys berip otyrmyz. Hımııalyq reagentter de jergilikti jerde óndirile bastady. Qazaqstandyq úlesti arttyrý tek munaı kompanııasynyń qolynda emes. Sondyqtan óndiristi damytý kerek dep esepteımiz. Biz qazir 10 myńnan astam taýarǵa tapsyrys berip otyrmyz»,- deıdi «SNPS-Aqtóbemunaıgaz» AQ-nyń memlekettik satyp alý departamenti basshysynyń orynbasaryAndreı Kýdeev.
Aqtóbe oblysynyń ákimi Berdibek Saparbaev 2018 jyl Aqtóbe úshin ekonomıkalyq serpilis jyly bolady dep atap ótken bolatyn. Óndiris oryndarynyń jumysyn baqylap, kedergilerdi joıý úshin ashyq esik kúni de ótkizilip jatyr.
«Memlekettik organnyń bári bızneske ashyq bolýy úshin jumys júrip jatyr. Sonymen qatar, iri óndiris oryndary da ashyq bolýy shart. Shaǵyn jáne orta bızneske esigin ashý mindeti qoıylǵan kezde iri munaı kompanııasy ashyq esik kúnin ótkizdi. Buryn munaı kompanııasyna óz taýaryn usyna almaǵan kompanııalar da shaqyryldy»,- dedi Aqtóbe oblysy ákiminiń orynbasary Qaırat Bekenov.