Aqtóbelik sheneýnik avtobýstaǵy jyrtyq oryndyq úshin tártiptik jaýapqa tartyldy
Aqtóbedegi jolaýshylar tasymalyna jaýapty «Avtopark» JShS qalalyq jolaýshylar kóligi jáne avtomobıl joldary bóliminiń basshysy Rýslan Tóreǵalıdi tártiptik jazaǵa tartýdy talap etti. QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Ádep keńesi tekserýge ózi barmaı, ózge mekemeni jibergen basshyny jazalamaýdyń joldaryn qarastyrǵanymen, esh amaldary qalmady. Sebebi, Aqtóbe qalasynyń turǵyny №27 baǵyttaǵy avtobýs oryndyǵynyń jyrtyǵyn sýretke túsirip, áleýmettik jelige salyp jibergen. Sol kezde qala turǵynynyń shaǵymyn kórgen Aqtóbe qalalyq jolaýshylar kóligi jáne avtomobıl joldary bólimi dereý iske kirisken. Biraq tekserýge ákimdik qyzmetkerleri emes, «TsÝP» JShS bardy. Avtobýstardyń júrý tártibi men ara qashyqtyǵyn baqylaıtyn bul mekeme «Avtopark» JShS-ne tıesili qoǵamdyq kólikterdi qaraýǵa esh quqyǵy bolmaǵan. Oqıǵa ornyndaǵy kelissózder men tartys uıaly telefonǵa túsirilip, jolaýshylar tasymaldaýshy mekeme memlekettik qyzmetshini jazalaýdy surady. Mundaı jaǵdaı Ádep keńesinde birinshi ret tirkeldi. Aldymen keńes músheleri daýys berýden bas tartyp, isti jazasyz sheshýdi surady.
«Barlyq áleýmettik jelige sýret shyǵaryldy. Avtobýs salony sanıtarlyq talapqa saı emes, oryndyqtary jyrtylǵan. Sol kezde ákimdik nazar aýdardy. Jolaýshylar tasymaldaýshy mekeme barlyq talapty saqtaýy kerek. Aryz óte kóp, ony da umytpaǵan jón», - dedi Ádep keńesiniń múshesi Sánııa Qaldyǵulova.
Degenmen Ádep keńesiniń tóraǵasy Qaıyrjan Toqyshev memlekettik qyzmetshiniń zań aıasynda jumys isteýi qajet ekenin aıtyp, jazalanatynyn jetkizdi.
«Sózge kelip, bir-birin uıaly telefondaǵy beınekameraǵa túsirýdiń qajeti joq edi. Memlekettik qyzmetshi zań boıynsha jumys istep, tapsyrys oryndaýshylar talap etýi tıis. Oǵan quqyǵy bar», - dedi Qaıyrjan Toqyshev.
Aıta keteıik, «Avtopark» JShS jol qaýipsizdigin, tazalyq pen avtobýstardyń ara qashyqtyǵyn retteıtin «TsÝP» JShS-men kelisimshartqa otyrýdy keıinge qaldyryp keledi. Bul kompanııa qaladaǵy qoǵamdyq kóliktiń 70 paıyzyn qamtyp otyrǵan soń jergilikti ákimdik «Avtopark» JShS-niń qyzmetinen bas tarta almaıdy.