Aqtóbelik polıtseıler mektepter janynda kezekshilikti kúsheıtti

AQTÓBE. QazAqparat – Aqtóbede «Qaýipsiz jol» aktsııasy barysynda polıtsııa qyzmetkerleri oqýshylarǵa jol erejesin túsindirdi, dep habarlaıdy QazAqparat tilshisi.

«Qaýipsiz jol» aldyn alý sharasy kezinde polıtsııa qyzmetkerleri jaıaý júrginshiler ótkelinde jáne jalpy bilim beretin mektepterdiń janynda kezekshilikti kúsheıtti. Negizgi maqsat – jol apatynyń aldyn alý, balalardyń ómirin saqtaý, mektep aýmaǵynda tártipti qamtamasyz etý.

«2020 jyly óńirde balalardyń qatysýymen 108 jol-kólik oqıǵasy tirkeldi. Barlyǵy 5 bala kóz jumyp, 119-y jaraqattandy. Balańyzdyń ómiri men densaýlyǵyna nemquraıly qaramańyz. Kóp jaǵdaıda balalar eresekterdiń kinásinen kóz jumady. Olardy arnaıy kreslosyz avtokólikke otyrǵyzady, ózi mas kúıde kólikti basqarady», - dedi Aqtóbe qalalyq polıtsııa bólimi patrýldik polıtsııa batalonynyń komandıri Ermek Shýkanov.