Aqtóbelik polıtseı Nıkolaı Troshın qazaq tilin úsh aıda meńgerip aldy
Aqtóbe oblysy, Mártók aýdanyndaǵy Іshki ister bóliminde jol-patrýldik polıtsııasynyń bastyǵy bolyp eńbek etetin Nıkolaı Troshın qazaq tilin tez meńgerip aldy. Ol kórshiles Reseı elinde dúnıege kelgen. Ulty - nemis. Keıin ákesi Vıktor Troshın jumys babymen Aqtóbe oblysynyń Hlebodar aýylyna qonys aýdarady. Orys tilinde bilim alyp, Jambyl oblysynda áskerı boryshyn ótegen ol úsh aı ishinde qazaq tilin úırenip alǵan.
«Tarazǵa áskerı boryshymdy óteýge barǵan kezde qyzmettesterimniń bári qazaq tilinde sóıledi. Men ǵana ózge ult ókili boldym. Buıryqtar, tapsyrmalar tek qazaq tilinde aıtylyp, mindetterimiz osy tilde túsindirildi. Eshkim orys tilinde sóılemedi. Sol kezde men óz ortama beıimdelip, bir aıda aýyzeki tilde sóıleıtin boldym. Al úsh aıda men qazaq tilin erkin meńgerip, saýatty sóılep kettim. Eki jyl áskerı boryshymdy ótep, úıime oralǵanda orys tilin múlde umytyp qaldym. Ata-anam, dostarym tańqaldy»,- dedi Nıkolaı Troshın.
Áskerı boryshyn ótep, qaıta oralǵan Nıkolaı Troshın Aqtóbedegi kúzet polıtsııasynda biraz jyl qyzmet etti. Al 2014 jyldan beri Mártók aýdandyq ishki ister bóliminde jumys istep júr.
«Jol-patrýldik polıtsııasynda jumys isteıtin ár qyzmetker qazaq tilin bilýi kerek. Sebebi, patrýl - polıtsııanyń aınasy. Olar kúnbe-kún halyq aldynda júredi. Birinshi kózge túsetin, aldyńǵy shepte bolyp, kómekke alǵash bolyp asyǵatyndar da solar. Sondyqtan halyqtyń tilin túsine bilý asa mańyzdy» - dedi ol.
Nıkolaı Troshın úsh balasyn da qazaq balabaqshalaryna apardy.
«Jubaıym ekeýmiz úsh bala tárbıelep otyrmyz. Jubaıymnyń ulty orys bolǵanymen, úıimizde únemi qazaqtyń ulttyq taǵamdary ázirlenedi. Shańyraǵymyzda aptasyna mindetti túrde et asylyp, baýyrsaq pisiriledi. Balalarym qazaq balabaqshalaryna baryp júr. Qazaqsha án aıtady, batany da beredi. «Balalar - bizdiń bolashaǵymyz» degen sóz tegin aıtylmaǵan. Biz óz balalarymyzdy qalaı tárbıelesek, elimizdiń keleshegi de sondaı bolatyny ras. Mysaly, balaǵa kishkentaı kezinen qoqysty kóshege tastamaýdy, arnaıy qoqys jáshikterine tastaýdy úıretýdiń ózi týǵan jerin qurmetteýge, kóshe sypyrýshylardyń eńbegin baǵalaýǵa, tazalyqqa umtylýǵa yqpal etedi. Ózimiz qandaı bolsaq, balalarymyz da sondaı bolady»,- dedi ol.