Aqtóbelik ózge ultty metallýrgter qazaq tilin úırenip jatyr
Aqtóbe ferroqorytpa zaýytynyń 56 jumysshysy qazaq tiliniń qarapaıym jáne bazalyq deńgeıdegi baǵdarlamasyn aıaqtady. Metallýrgter arasynda úzdikteri de bar.
«Barlyǵy 56 til úırenýshiniń 40-y ózge ult ókilderi eken. Ózge ult ókilderiniń memlekettik tildi úırenýge qushtarlyǵy, qyzyǵýshylyǵy joǵary. Olar óndiriste qoldanylatyn termın sózderdi jaqsy meńgergen. Aldaǵy ýaqytta jumysshylardy aýyzeki tilge baýlı otyryp, óndiriste qoldanylatyn termın sózderdi barynsha qazaq tilinde qoldaný kerek degen usynys aıtamyn, - deıdi Aqtóbe oblystyq tilderdi damytý basqarmasynyń ádiskeri Aqmaral Súgirbaeva.
Zaýyt jumysshylary aptasyna eki ret eki saǵat boıy til úırenedi. Kezekti oqý jyly aıaqtalyp, emtıhan tapsyrǵan jumysshylardyń 30-y qazaq tiliniń kýrsyn úzdik baǵaǵa aıaqtady. Al ózgesi jaqsy jáne qanaǵattanarlyq degen baǵa aldy. Metallýrgter barlyǵy bes topqa bólinip, tildi úırendi. Qazir olar demalysqa shyǵyp, oqý jylyn kúzde qaıta bastaıdy.
«Men zaýytqa jumysqa ornalasqan boıda munda memlekettik tildi oqytý kýrstarynyń bar ekenin estip, birden jazyldym. Memlekettik tildi úırenip júrgenime eki jyldaı ýaqyt boldy. Osy kýrstyń arqasynda qazaq tilin úırenip, qazaq dostarymmen emin-erkin sóılesip júrmin. Meniń oıymsha, elimizdi, jerimizdi qasterleıtin jáne ózin qadirleıtin kez kelgen qazaqstandyq azamat memlekettik tildi bilýi tıis dep oılaımyn. Al bizdiń zaýytta memlekettik tildi úırenýge barlyq jaǵdaı jasalǵan. Tek nıet bolsa bolǵany», - deıdi temirjol tsehynyń jol burýshysy Polına Ovsıenko.