Aqtóbelik oqýshylar kenshilerdi ýlanýdan saqtaıtyn qurylǵy oılap tapty

ASTANA. QazAqparat - Bıyl Digital Bridge-2022 forýmy aıasynda ótken oqýshylar arasyndaǵy baıqaýǵa qatysýshylar sany rekordtyq kórsetkishke – 800 adamǵa jetti, dep habarlaıdy QazAqparat.

Oqý-aǵartý mınıstrliginiń málimetinshe, bul 2021 jylmen salystyrǵanda eki ese kóp. Jeńimpaz komandalar 300 myńnan 4 mln teńgege deıin syıaqylar alady.

Oqýshylar arasyndaǵy konkýrs 1 naýryz ben 27 qyrkúıek aralyǵynda ótti. Qatysýshylar ártúrli salalarda biregeı IT sheshimder ázirleý arqyly saıysqa tústi. Júldeli oryndardy Aqtóbe (Virgo), Qostanaı (Ortus) jáne Shymkent (Kazbionics) oqýshylarynan quralǵan komandalar ıelendi.

370 komandanyń ishinen eń myqty 10 komanda irikteldi. Baıqaýdyń mundaı formaty bolashaq kóshbasshylarǵa shyǵarmashylyq qabiletterin damytýǵa jáne mańyzdy máselelerdi erekshe jolmen sheship, zamanaýı tsıfrlyq jobalardy ǵylymdy, tehnologııany, ınjenerııa men matematıkany paıdalana otyryp, ázirleýge múmkindik beredi.

«Búgin forýmda Memleket basshysy tsıfrlyq ekonomıka men Indýstrııa 4.0-di damytý elimiz úshin basym baǵyt bolatynyn jáne adamı kapıtaldy nyǵaıtý keregin aıtty. Mundaı is-sharalar - daryndy balalarǵa kórsetilgen úlken qoldaý jáne yntalandyrý, sondaı-aq jańa ıdeıalar men shyǵarmashylyq tsıfrlyq sheshimderdi júzege asyrý múmkindigi. Qatysýshylar men olardyń tálimgerlerine startaptardy elimizde ǵana emes, shetelde de tabysty bıznes-jobalarǵa aınaldyrýdy tileımin», - dedi marapttaý rásiminde Oqý-aǵartý vıtse-mınıstri Aıbat Іlııasov.

Birinshi oryn alǵan komanda kenshilerdi zııandy shyǵaryndylarmen ýlanýdan saqtaıtyn arnaıy qurylǵy oılap tapty.

«Biz jobany uzaq ýaqyt ázirledik. Jeńiske jetkenimizge óte qýanyshtymyz. Jobamyz - bul portatıvti gaz analızatorynyń jumys isteıtin kesheni jáne oǵan arnalǵan mobıldi qosymsha. Nuret ss qurylǵysy kúndelikti qıyn fızıkalyq jaǵdaılarda jumys isteıtin, kóbinese ómirine qaýip tóndiretin kenshilerge arnalǵan. Qurylǵy shahtalarda jınalatyn qaýipti gazdardyń usaq býlaryn ustaı alady. Osylaısha, IT qurylǵy kenshige densaýlyǵyna qaýip tónýi múmkin ekeni týraly eskertedi», - dep aıtty baıqaý jeńimpazdary.

Ekinshi oryndy Ortus komandasynyń startapy ıelendi. Oqýshylar egistikterdi tozańdandyrýǵa jáne óńdeýge arnalǵan aýylsharýashylyq robotyn qurastyrdy.

Úshinshi oryn alǵan Kazbionics komandasy tolyqqandy qol protezderin jasap shyǵardy.

Forým aıasyndaǵy Samsung startap baıqaýy jyl saıyn ótkiziledi jáne ol IT salasyndaǵy kreatıvti jáne zamanaýı sheshimderdi anyqtaýǵa baǵyttalǵan.