Aqtóbelik oqýshy zorlyq-zombylyqty eskertetin mobıldi qosymshasyna avtorlyq quqyq aldy

AQTÓBE. QazAqparat - Nazarbaev zııatkerlik mektebiniń oqýshysy zorlyq-zombylyqty eskertetin mobıldi qosymshasyna avtorlyq quqyq aldy, dep habarlaıdy QazAqparat tilshisi.

Turmystaǵy zorlyq-zombylyqty boldyrmaý úshin aqtóbelik oqýshy biraz eńbektendi. Nazarbaev zııatkerlik mektebiniń 11 synyp oqýshysy Aıan Qaıyrbek «UmaiAsar» mobıldi qosymshasyn oılap tapty. Bul mobıldi qosymshany qoldaný úshin Android júıesi qajet bolady. Qosymshaǵa kirgen kezde senimdi úsh telefon nórimin terý mańyzdy. Qajet bolǵan jaǵdaıda bul nómirlerge shuǵyl habarlama jiberiledi. Sonymen birge mobıldi qosymshaǵa kirgen kezde birden mekenjaıy anyqtalady. Sóıtip habarlama jiberilgen kezde mekenjaıy da anyq kórinedi.
«Mobıldi qosymsha zorlyq-zombylyqty boldyrmaýǵa septigin tıgizedi dep senemiz. Adamdarǵa jedel medıtsınalyq, psıhologııalyq kómek berý de mańyzdy»,- dedi oqýshynyń jetekshisi Shadııar Tajgýrazov.

Oqýshy Aıan Qaıyrbek pandemııa bastalǵanda osy mobıldi qosymshany jasaýǵa bekingen. Byltyr ІІM men TJM resmı hat joldap, 102 jáne 112 nómirlerine habarlama jiberý úshin tehnıkalyq múmkindigin saralady. Ókinishke qaraı bul baǵytta habarlama jiberý múmkin bolmaı tur. Eger osy tetik iske qosylsa, Aıan Qaıyrbek mobıldi qosymshasyna qosýǵa múmkindik alady.
«Mobıldi qosymsha úshin Konstıtýtsııa jáne Qylmystyq, Ákimshilik kodeksterdegi málimetterdi paıdalandym. «UmaiAsar» qosymshasy bolsa bir tetikti basyp, kómek shaqyra alsyz. Oǵan baılanys aıasynda bolý shart emes. Sonymen birge munda Qazaqstandaǵy daǵdarys ortalyqtary, medıtsınalyq kómek pen zańnamalar kiristirilgen»,- dedi oqýshy.