Aqtóbelik oqýshy qyz Dımash Qudaıbergenniń Londondaǵy kontsertine qatysady
«DQ» atty jańa shoý Ulybrıtanııadaǵy Qazaqstannyń mádenıet kúnderi aıasynda ótedi. Kontsertti QR Mádenıet jáne sport mınıstrligi uıymdastyryp otyr. Oǵan Qazaqstan Respýblıkasynyń Ulybrıtanııa men Soltústik Irlandııa Birikken Koroldigindegi Elshiligi qoldaý kórsetti.
Bıyl jazda Aqtóbe qalasynda balalar baıqaýy ótken bolatyn. Oǵan Dımash Qudaıbergen qonaq jáne táýelsiz sarapshy retinde qatysqan. Ol arnaıy júldeni 13 jasar aqtóbelik ánshi Nargız Januzaqovaǵa tabystady. Jas qyz óz ánin tórt jyl buryn dúnıeden ótken ákesine arnaǵan edi. Dımashtyń sózi boıynsha tańdaý jasaý ońaıǵa soqpady jáne ol qatysýshylardyń ónerine tánti boldy. Dımashtyń álemdik týrne aıasyndaǵy jeke kontsertteriniń birine qatysý múmkindigi dál osy Nargızǵa buıyrdy.
Oryndaýshy óz ýádesinde turdy. 19 qarashada Londonda Nargız Januzaqova «Indigo at the O2» kontsert zalynyń sahnasynda «Astana - elimniń júregi» ánin oryndaıdy. Osylaısha bul Qazaqstannyń jas talanttaryn qoldaý men damytýǵa qosqan taǵy bir úlesi bolmaq.
Eske sala ketsek, bul kesh QR Mádenıet jáne sport mınıstrliginiń Jas talanttardy qoldaý baǵdarlamasy aıasynda uıymdastyrylyp otyr. 10 jyl ishinde baǵdarlama 1000-nan astam jas darynnyń halyqaralyq deńgeıdegi baıqaýlarǵa qatysýyna septigin tıgizdi. Baǵdarlamaǵa shyǵarmashylyqtyń ártúrli salasynyń ókilderi qatysa alady: sýretshiler, modelder, sángerler, ánshiler, mýzykanttar.