Aqtóbelik oqýshy halyqaralyq olımpıadada altyn medal jeńip aldy
IGeO-2022 halyqaralyq geografııa olımpıadasy kezinde Nazarbaev zııatkerlik mektebiniń oqýshysy Sanjar Hamıtovtiń altyn medal jeńip alǵany belgili boldy. Bul osy olımpıadadaǵy ekinshi úlken jeńis. Parıjde qashyqtan uıymdastyrylǵan zııatkerlik jarysqa álemniń 54 elinen 216 jas geograf qatysqan. Qatysýshylar jazbasha ári mýltımedıalyq testileýden jáne kartografııalyq beıneleý tapsyrmalarynan ótti. Nátıjesinde Qazaqstan ulttyq qurama qomandasynyń atynan qatysqan aqtóbelik oqýshy IGEO – 2021 jarysynyń jeńimpazy atandy.
«IGeO-2022 halyqaralyq olımpıadasyna qatysý armanym edi. Sóıtip
9-synyptan bastap tynbaı eńbektendim. Keıde óz-ózime kóńilim tolmaı, senimsizdik tanyttym. Biraq oqýdy, izdenýdi toqtatqan emespin. Al olımpıadadaǵy jeńiske keler bolsam, múlde júlde alamyn dep oılamadym. Qazir «daıyndyǵym tııanaqty boldy» dep oılap otyrmyn. Adam alǵa qoıǵan maqsatqa tabandylyǵymen jete alady», - dedi Sanjar Hamıtov. Ol geografııa pánin erekshe jaqsy kórip oqıdy. Eske salsaq, Sanjar Hamıtov buǵan deıin EGeO – 2022 eýropalyq olımpıadada jeńimpaz atanǵan bolatyn. Ol joǵary lıganyń 16-19 jas aralyǵyndaǵy qatysýshylary arasynda absolıýtti jeńimpaz atandy.
«Mınıstr Ashat Aımaǵambetov olımpıada jeńimpazdary alǵash ret aqshalaı syılyq alatynyn atap ótti. Sonymen qatar, mektepishilik olımpıada jeńimpazdary UBT-dan ótpeı-aq otandyq joǵary oqý oryndaryna túsýge múmkindik alady. Máselen, altyn medal alǵan oqýshyǵa 4,5 mıllıon, kúmis medalǵa 3 mıllıon, qola medalǵa 1,5 mıllıon teńgeden astam aqshalaı syılyq beriledi. Mektep oqýshylaryn jarysqa daıyndaǵan ustazdar da marapattalatynyn mınıstrlik habarlady», - dedi Aqtóbedegi Nazarbaev zııatkerlik mektebiniń baspasóz qyzmeti.