Aqtóbelik qurylysshylar Arystaǵy jumystaryn erteń aıaqtaıdy
Arys qalasyn qalpyna keltirý jumystary kezinde Aqtóbe oblysyna 12-shi sektor bólindi. Munda 789 úı bar. Sarapshylar tekserip, tizimge alyp, 543 úıge zaqym kelgenin anyqtady. Arnaıy qorytyndy shyǵarý jumystary 25 tamyz kúni aıaqtalǵan bolatyn. Sol kezde 246 úıdiń ıesi qandaı da bir jóndeý jumystaryn qajet etpeıtinin jazyp, kómekten bas tartty.
«Alaıda olardyń 73-i Arys qalasynyń ákimdigine qaıta aryz jazyp, jóndeý qajet dep suraǵan. Qala ákiminiń suranysyna saı sol 73 úıge oblystyń qurylys kompanııalary jóndeý jumystaryn júrgizip berdi. Sebebi sol úılerde múgedekter men ardagerler, áleýmettik jaǵynan az qamtylǵan otbasylar turady. Máselen, tótenshe jaǵdaı kezinde qaza bolǵan áskerı qyzmetker Baýyrjan Álimbekovtyń úıine kúrdeli jóndeý júrgizildi. Úıine jarylǵysh zat qulaǵan turǵynnyń baspanasy qaıta salyndy. Tótenshe jaǵdaı kezinde otaǵasy qaza bolǵan kópbalaly otbasynyń buryn úıi tolyq bitpeı turǵan. Oblys ákimi Ońdasyn Orazalınniń tapsyrmasymen ol úı de tolyq salyndy. Tekserý kezinde 37 úıge kúrdeli jóndeý qajet boldy. Onyń 24-inde jumys tolyq aıaqtaldy», - dep habarlaıdy oblys ákiminiń baspasóz qyzmeti.
Aıta keteıik, turǵyndardyń ekeýi tehnıkalyq tekserý qorytyndysymen kelispegen. Úı ıeleri jóndeýge qajetti qarjyny ózderine berýin suraǵan. Aqtóbe oblysy 11 qyrkúıekte jumysty tolyq aıaqtaýdy josparlap otyr. Bul jumystarǵa 6 qurylys kompanııasy men 395 adam jumyldyrylǵan.