Aqtóbelik kitaphanashylar saıabaqta oqyrmandaryn shaqyryp júr
Aqtóbe qalalyq kitaphanasynda 28 myńnan astam kitap bar. Oqyrmandarynyń sany 5 myńnan asqanymen, onyń tek 3 myńnan astamy turaqty kelip, kitap alyp turady eken.
«Bizge kóbine mektep oqýshylary keledi. Internet bolǵanymen balalar kitapqa jaqyn. Aqtóbe qalasynda barlyǵy 12 kitaphana bolsa, teń jartysy jaqyn mańdaǵy aýylda ornalasqan. Biz aqparattyq paraqsha daıyndap, jaz aıynda oqyrmandy tartý úshin saıabaqqa shyqtyq. Adamdar kitapqa qyzyǵady, biraq olardyń qataryn áli de arttyrǵymyz keledi. Muǵalimder jaz aıynda oqıtyn ádebı kitaptardyń tizimin bergen eken. Balalar ata-ájelerimen kelip júr. Biz lager men mektepti qamtyp otyrmyz»,- dedi kitaphanashy Janar Qazbekova.
Aıta keteıik, kitaphanashylar qaladaǵy saıabaqtar men halyq kóp shoǵyrlanatyn oryndarǵa baryp, jumys aıaqtalǵan soń arnaıy aqparattyq paraqshalar taratady. Kitaphanashylar qoǵamdyq kólikterde de oqyrmandaryn shaqyryp júr.
«Ár jeksenbi kúni ashyq aspan astynda kitap kórmesin uıymdastyramyz. Bizdiń qolymyzdaǵy aqparattyq paraqshany alyp, qoqysqa tastaǵan adamdardy kórgenimiz joq. Keıbir adamdar arnaıy surap alady»,- dedi kitaphanashy Jumasulý Qoıgeldıeva.