Aqtóbelik kásipkerler qymbat kólikteriniń salyǵyn tólemeı júr

AQTÓBE. QazAqparat - Aqtóbelik kásipkerler kólik salyǵyn tólemeı júr. Olardyń arasynda qaladaǵy iri qonaq úıdiń basshysy, araq zaýytynyń qojaıyny bar, dep habarlaıdy QazAqparat tilshisi.

Aqtóbedegi memlekettik kirister departamenti 1 qyrkúıek kúni kólik salyǵyn tólemegen adamdardyń tizimin jarııalaıdy. Aqtóbede temir tulparyna salyq tólemegenderdiń sany 17 myńnan asqan. Olar memleketke 321,3 mıllıon teńge qaryz. Boryshkerlerdiń kóbi qymbat kólikteriniń salyǵyn tóleýge asyǵar emes.

«Jol talǵamaıtyn 108 kóliktiń ıesi 60 mıllıon teńge salyq tóleýi tıis. Іs sotqa joldanyp, qazir qaryzdy qaıtarý jumysy sot oryndaýshylaryna júkteldi. Barlyǵy 1 300-den astam is boıynsha sot oryndaýshylary qaryzdy óndirip jatyr», - dedi oblystyq memlekettik kirister departamentiniń bólim basshysy Abat Bekmýrzın.

Aıta keteıik, kólik salyǵy elimizde mindetti bolyp tabylady. Salyqty qala turǵyndary kez kelgen bankke, tólem termınaldary nemese uıaly telefon arqyly da tóleı alady.

«Salyq tólemegenderdiń arasynda araq zaýytynyń ıesi Ómirbek Álishev te bar. Onyń qaryzy 400 myń teńge, al kásipker Tóreahmet Sándibekov 1,3 mıllıon teńge bereshek»,- dedi Abat Bekmýrzın. Tizimniń kóshbasynda turǵan bul kásipkerler oblystyń, qalanyń qurmetti azamattary atanǵan, iri kásip ıeleri. Bárine habarlama berilip, salyq týraly aqparattandyryldy.