Aqtóbelik kásipkerler balalarǵa Naýryz merekesin uıymdastyrdy
Aqtóbe qalasyndaǵy ulttyq at sport túrleri boıynsha balalar men jasóspirimder mektebiniń tárbıelenýshileri búgin qalanyń bas dańǵylymen júrip ótti. Kerýenge mingen qyz-jigitter án aıtyp, atty jigitter qala turǵyndary men qonaqtarǵa merekelik kóńil-kúı syılady. Sonymen qatar, qalanyń shaǵyn saıabaqtarynda Naýryz merekesine oraı kontsert uıymdastyrylyp, ulttyq sport dáripteldi. Al aqtóbelik kásipkerler barlyǵy 5 myń balaǵa qýanysh syılady.
«Árbir memlekettiń bolashaǵy balaǵa baılanysty. Sondyqtan ár memleket balalarynyń jaqsy bilim alyp, densaýlyqtary myqty bolýy úshin barlyq jaǵdaıdy jasaıdy. Táýelsizdik alǵan jyldan bastap Elbasy Nursultan Nazarbaevtyń basshylyǵymen balalarǵa kóp kómek berildi. «Rýhanı jańǵyrý» baǵdarlamasy aıasynda bıyl Aqtóbede Balalar jyly dep jarııalandy. Maqsatymyz - barlyq múmkindikti paıdalanyp, Aqtóbe oblysynyń balalaryna jaǵdaı jasaý. Balalar óz zamandastarynan kem bolmaýy tıis. Bilim alyp, óner, mádenıet, sportpen aınalysý kerek. Mektep, balabaqsha, mádenıet, sport nysandarynyń bári balalarǵa arnalǵan. Árbir ata-ananyń armany -balanyń qýanyshy. Búgin Aqtóbeniń barlyq aýylynda úlken is-shara ótip jatyr. Eń aldymen az qamtylǵan otbasy, ata-ananyń qamqorlyǵynsyz qalǵan, jaqsy oqıtyn, úzdik balalarǵa mereke syılaımyz. Kásipkerlerge alǵysymyzdy aıtamyz. Aktsııaǵa árbir aqtóbelik azamat, kásipker qatysyp, kómek berse, balany kóp qamtı alamyz. Árbir bala úlkenderdiń qamqorlyǵyn sezinýi tıis»,- dedi oblys ákimi Berdibek Saparbaev.
Aıta keteıik, Aqtóbe qalasyndaǵy kásipkerler az qamtylǵan, ata-ananyń qamqorlyǵynsyz qalǵan, ozat, úlgini balalarǵa dastarqan jaıyp, olarǵa merekelik syı jasady. «Baqytty bala - Máńgilik el» aktsııasy aıasynda balalar tegin mýltfılm tamashalap, oblys ákimi Berdibek Saparbaev oqýshylarǵa 100 kitap syılady. Barlyǵy 100-den astam bala muz aıdynynda tegin syrǵanap, arnaıy kontsertti tamashalady.