Aqtóbelik kásipkerler alaıaq áıelge aldanyp qaldy

AQTÓBE. QazAqparat - Aqtóbede ústemeaqysy tómen nesıe alyp beremin dep kásipkerlerdi aldaǵan áıel ustaldy. Oǵan birneshe kásipker senip qalǵan, dep habarlaıdy QazAqparat tilshisi.

Aqtóbe oblystyq ishki ister departamenti alaıaqtyq jasady degen kúdikpen 30 jastaǵy kelinshekti ustady. Ol bızneske qajetti nesıeni tómen ústemeaqymen alyp berýge ýáde etken.

«Shaǵyn jáne orta bıznes ıeleriniń senimine kirip, ústemeaqysy tómen nesıe alyp beremin dep aldaǵan. Qazir 8 kásipkerdiń aldanǵany anyqtalyp otyr. Olardyń árqaısysy 250-500 myń teńge aralyǵynda aqsha berip, ekinshi deńgeıli bank arqyly paıyzdyq ústemeaqysy tómen nesıe rásimdemek bolǵan», - dep habarlaıdy ІІD baspasóz qyzmeti.

Qazir Qylmystyq kodekstiń «Alaıaqtyq» baby boıynsha is qozǵaldy. Kúdikti eshqaıda ketpeý týraly qolhatpen bosatyldy. Polıtsııa jas áıeldiń arbaýyna túsip, aldanyp qalǵan kásipkerler bolsa, kezekshi bólimge habarlasýyn suraıdy.