Aqtóbelik kásipker jalǵyz baspanasyn satyp, plastıkalyq qubyr shyǵaryp jatyr

AQTÓBE. QazAqparat – Aqtóbelik kásipker Janat Dáýrenbekov eki bólmeli páterin satyp, plastıkalyq qubyr shyǵaratyn qural-jabdyq satyp aldy. Qazir elimizdiń ár óńirinen shıkizat satyp alyp jatyr, dep habarlaıdy QazAqparat tilshisi.

Janat Dáýrenbekov buǵan deıin ózi satyp alǵan plastıkalyq qubyr tsehynda jumys istegen. Jumysshy ári atqarýshy dırektor bolǵan oǵan kásip ıesi usynys jasap, bárin satatynyn aıtqan.

«Ózim plastıkalyq qubyr shyǵaratyn tsehta uzaq jyl jumys istep, bárin meńgerip aldym. Burynǵy basshym osy tsehty satyp alýdy usynǵan kezde táýekelge bel býyp, páterimdi sattym. Tabys jaqsy, shıkizatty elimizdiń ózge óńirlerinen tasımyn. Qazir barlyq qurylys kompanııalary tapsyrys beredi, jumys turaqty», - dedi kásipker J.Dáýrenbekov.

Óndiris ornyna «Eńbek» baǵdarlamasy aıasynda «Damý» qory 8 mıllıon teńge berdi. Bul qarjyǵa kásipker shıkizat satyp aldy. Atyraý, Aqtaý, Oral qalalarynan da plastıkalyq qubyrǵa qajettisi jetkiziledi.

«Qazir bes adam jumys isteıdi. Bárine jumys isteýdi ózim úırettim. Kásipkerlikti damytý maqsatynda kúlgin tústi qubyrdy shyǵarý ádisin Reseıden úırenip keldim. Bul qubyrlar káriz júıesine qajet», - dedi J.Dáýrenbekov.

«Damý» qory Aqtóbe oblystyq fılıalynyń dırektory Berik Nurǵalıevtiń aıtýynsha, bıyl «Eńbek» baǵdarlamasy aıasynda 81 jobaǵa qoldaý bildirildi. Qazirgi kezde onyń 62-i maquldanyp, 750 mıllıon teńgeden astam nesıe berildi.

Sonymen qatar búgin press-týr uıymdastyrylyp, kir sabyn shyǵaratyn, munaı jabdyqtaryn qurastyratyn óndiris orny tanystyryldy. Máselen, kir sabyn shyǵaratyn tsehta bar bolǵany úsh adam eńbek etedi. Kún saıyn 500-600 keli sabyn bazarǵa jetkizilip jatyr.

«Shıkizatqa qajetti ósimdik maıyn qaladaǵy meıramhana, dámhanalardan satyp alamyz. Sonymen qatar palma maıy da bar. Al maldyń maıy Alǵa aýdanyndaǵy et klasterinen jetkiziledi. Suranys joǵary, qazir Reseıdiń kórshiles oblystary tasyp jatyr», - dedi tsehtyń atqarýshy dırektory Nurbol Quljabaev.

Sabyn óndirisin qolǵa alǵan kásipkerler 2018 jyldyń naýryz aıynda «Damý» qory arqyly 11 mıllıon teńge nesıe aldy. Oǵan qural-jabdyq jetkizildi. Nesıe 6 paıyzdyq ústemaqymen berilgen. Bul «Eńbek» jappaı kásipkerlikti damytý baǵdarlamasy aıasynda qolǵa alynǵan is.

Aıta keteıik, bıyl «Damý» qorynyń oblystyq ókildigi 1,8 mıllıard teńgeniń 110 jobasyn kepildendirdi. «Bıznestiń jol kartasy – 2020» baǵdarlamasy aıasynda quny 6,6 mıllıard teńgeniń 115 jobasynda paıyzdyq ústemaqyny sýbsıdııalady.