Aqtóbelik kásipker buqtyrylǵan etti satý úshin áleýmettik jelige júginetinin jasyrmady

AQTÓBE. QazAqparat - Aqtóbelik kásipker Samat Qaldyǵulov buqtyrylǵan tseh ónimin sata almaı otyr. Ol adamdarǵa usynǵanymen, kóbi baǵasy qymbat dep bas tartatynyn jasyrmady , dep habarlaıdy QazAqparat tilshisi.  

Aqtóbedegi «Aıbek» sharýa qojalyǵy ótken jyly buqtyrylǵan et shyǵaratyn tsehty iske qosty. Joba quny - 500 mıllıon teńge. Qazir munda sıyr, qoı, jylqy eti men sıyr eti qosylǵan kúrish, asburshaq, qaraqumyq shyǵarylady. Іshki naryqqa satýǵa shyǵarylǵan ónim suranysqa ıe bolmady. Sebebi, baǵa ózge buqtyrylǵan etke qaraǵanda qymbat. Kásipker taza, adal ónim baǵasynyń arzan bolmaıtynyn alǵa tartyp otyr.

«Biz taza ónim shyǵaramyz. Buqtyrylǵan et ishinde qospa joq, baǵa joǵary. Qalbyrǵa ónim salmaǵy 325 gramm bolsa, onyń 287 gr taza et. Etti óz sharýashylyǵymyzdan alamyz. Jan-jaǵymyzda 17 sharýashylyq jumys istep tur. Et klasterin damytyp otyrmyz. Maldy bordaqylaımyz, soıyp, satamyz. Al tsehtyń qural-jabdyǵy Polshadan ákelindi. Avtomatty qurylǵy 1 mınýtta 120 qalbyrǵa tuz, burysh, maıyn, etin salyp úlgeredi»,- dedi kásipker Samat Qaldyǵulov.

Kásipker jańa jobany iske asyrǵan kezde ónimniń suranysqa ıe bolatynyna senimdi boldy. Biraq úmit aqtalmady. Áli de suranys az.

«Adamdar qalbyrdyń ishinde ne bar eken dep kúmánmen qaraıdy. Sondyqtan áleýmettik jelini paıdalanyp, jarnamalaýǵa shyqtyq. Sapasyna syn aıtqan eshkim bolmady. Qazir Reseıge tasymaldap jatyrmyz. Jylyna 200 myń dana ónim jibere alamyz. Máskeý, Orynbor, Chelıabige de jiberemiz. Bir aýysymda 48 myń dana ónim shyǵara almyz. Ázirge tseh tolyq qýattylyqta jumys istep turǵan joq»,- dedi Samat Qaldyǵulov.

Aqtóbege jumys sapary kezinde Aýyl sharýashylyǵy mınıstri Ómirzaq Shókeev tseh ónimimen tanysty. Kásipker ónim naryǵyn izdeýge kómektesýdi surady.