Aqtóbelik kásipker aýyl turǵyndaryna aspaly kópir salyp berdi

AQTÓBE. QazAqparat – Aqtóbede kásipker Qarǵaly ózenine aspaly kópir salyp berdi. Bul turǵyndar, sonyń ishinde oqýshylar úshin qaýipsiz, dep habarlaıdy QazAqparat tilshisi.

Aýyl turǵyndary eski kópirdiń jaıyn «Nur Ǵasyr» meshitine aıtyp, kómek surady. Al meshit ımamdary qaıyrymdylyq aktsııasyna belsendi qatysyp, halyqqa kómek berip júrgen kásipkerge ótinishti jetkizdi. Aqtóbe qalalyq máslıhattaǵy «Nur Otan» fraktsııasynyń múshesi Ardaq Ótegenov Sarbaz aýyly men Qarǵaly turǵyndar massıvinde turatyn adamdarmen kezdesip, máseleniń mán-jaıymen tanysty. Keıin kómek kórsetýge sheshim qabyldady.

Ol úshin qurylysqa qajetti materıaldarǵa tapsyrys berip, bir aı boıy jumysshylar eńbek etti.

«Qalaǵa avtobýspen qatynaý úshin jáne dúkennen azyq-túlikti alý úshin ózenniń arǵy betine jıi ótýge týra keledi. Jyl saıyn sý kóterilgende eski kópirdi shaıyp ketetin edi. Sondyqtan sapasy syn kótermeıtin. Taıyz bolsa, sýdy keship ótip júrdik. Endi mine, sapaly kópir salynǵanyn kórip, qýanyp otyrmyz. Muny jasap bergen azamatqa aıtar alǵysymyz mol», - deıdi «Gaýhar» baý-baqsha ujymynyń turǵyny Tamara Muhambetııarova.

Aıta ketý kerek, Ardaq Ótegenov budan buryn balalarǵa sport alańyn salyp berdi.