Aqtóbelik isker áıelder saılaýda óz tańdaýyn jasaýǵa úndedi

AQTÓBE. QazAqparat - Aqtóbede isker áıelder forýmy ótti. Forýmǵa qatysýshylar el bolashaǵyna serpin berip, damýyn jetildiretin saılaýǵa qatysýǵa shaqyrdy, dep habarlaıdy QazAqparat tilshisi.

Aqtóbedegi «Anaǵa taǵzym» ortalyǵynda oblystyń jáne oblys ortalyǵynyń isker áıelder qaýymdastyǵy, oblystyq suıytylǵan gaz tasymaldaý qaýymdastyǵy forým ótkizdi. Kásipkerler aqtóbelikterdi saılaýǵa qatysyp, óz tańdaýyn jasaýǵa shaqyrdy.

«Elimizde táýelsizdik alǵan kúnnen bastap gender saıasatyna, ana men bala ómirine erekshe kóńil bólinip keledi. «Doing Business» dúnıejúzilik bank reıtıngi boıynsha Qazaqstan 140 eldiń ishinen genderlik teńdik boıynsha 44-orynda tur. Sonymen qatar áıelderdiń bıznestegi kórsetkishi boıynsha 30-orynda kelemiz. Elimiz boıynsha jalpy aımaqtyq ónimniń 40 paıyzy áıelderdiń úlesinde. Jyl ótken saıyn ekonomıkanyń damýyna áıelder de óz úlesin qosyp, alǵa umtylyp keledi. Osy turaqtylyqty saqtap, alǵa qadam basý úshin elimizde tańdaý jasaıtyn sát týdy. Men ózge áriptesterimdi, áıelder qaýymyn belsendi bolýǵa shaqyramyn», - dedi kásipker Aınur Baqtyǵalıeva.

Jıyn kezinde Aqtóbe oblystyq suıytylǵan gazdy tasymaldaý qaýymdastyǵynyń tóraıymy Altynaı Muqanova da óz pikirin ortaǵa saldy. Onyń aıtýynsha, el ishindegi turaqtylyqty saqtaý maqsatynda durys tańdaý jasaý qajet.

«El ishindegi turaqtylyq ekonomıkamyzdyń órken jaıýyna yqpal etti. Biz aldaǵy ýaqytta damý jolyn jalǵastyrýymyz kerek. Ol úshin saılaýǵa baryp, tańdaý jasaǵan durys», - dedi Altynaı Muqanova.