Aqtóbelik dárigerler BUU-nyń arnaıy qory arqyly biliktilikterin arttyrmaq
Aqtóbe oblysynyń ákimi Berdibek Saparbaev búgin BUU Halyqty qonystandyrý salasyndaǵy qorynyń Qazaqstandaǵy ókili Djýlııa Valezemen kezdesti. Kezdesýde ana men bala densaýlyǵyn saqtaý, jastardyń reprodýktıvti densaýlyǵyn qorǵaý jobasy qorytyndylandy. Nátıjesinde 65 dáriger men 120 orta býyn medıtsına qyzmetkeri semınarlarmen jáne trenıngterge qatysyp, 50 maman jatyrdaǵy uryqtyń kútimin jasaýdy meńgerdi. BUU Halyqty qonystandyrý salasyndaǵy qory ana men bala densaýlyǵyn nyǵaıtý, ana men perınataldy ólim-jitimdi azaıtý maqsatynda jańa tehnologııalardy engizýge qoldaý kórsetti. Ári kolledjtiń oqytýshylary reprodýktıvti densaýlyqty qorǵaýǵa baǵyttalǵan «Valeologııa» kýrsyn támamdady.
«Jastar bir-birine kóbirek senedi. Sondyqtan, jasóspirimderdiń kóshbasshylyq jáne kommýnıkatıvtik qasıetterin arttyrý maqsatynda Aqtóbede Y-PEER erikti jastar uıymyn ashýǵa qoldaý kórsetýdi sheshtik»,-dedi D.Valeze.
BUU Halyqty qonystandyrý salasyndaǵy qory men Aqtóbe ákimdigi jumysty ári qaraı jalǵastyrýdy maqsat etip otyr.
«Qazaqstanda Memleket basshysy N.Nazarbaevtyń jetekshiligimen halyqtyń áleýmettik máselelerin sheshýge, sonyń ishinde bilim berý men densaýlyq saqtaý salalaryn damytýǵa basa nazar aýdarylady. Memorandým aıasynda júzege asyrylǵan sharalardyń arqasynda biz analardyń densaýlyǵy men jastardyń reprodýktıvti densaýlyǵyn qorǵaý suraqtaryna baılanysty birqatar máselelerdi sheshýge múmkindik aldyq. Sizderdiń mamandaryńyzdyń tájirıbelerine baǵa jetpeıdi»,-dedi Berdibek Saparbaev.