Aqtóbelik arnaıy jasaq qyzmetkerleri Azııa chempıonatynan jeńispen oraldy

AQTÓBE. QazAqparat - Aqtóbe oblystyq Іshki ister departamentiniń eki qyzmetkeri Azııa chempıonatynan jeńispen oraldy. Olar Parıjde ótetin Álem chempıonatyna qatysady, dep habarlaıdy QazAqparat tilshisi.

Aqtóbe oblysyndaǵy ІІD Arnaıy daıarlyq basqarmasynyń ınspektory Shyńǵys Shoqpytov pen jedel áreket etetin arnaıy jasaq Aleksandr Borısov Mońǵolııanyń astanasy Ulanbatyr qalasynda ótken Azııa chempıonatyna qatysty. Chempıonatta «Sardar» laqap atymen tanymal Shyńǵys Shoqpytov altyn medal ıelendi. Ol 100 kelige deıingi salmaq sanaty boıynsha Mońǵolııa, Qyrǵyzstan, Koreıa elderinen qatysqan qarsylastarynan basym tústi.

«Árbir sportshy jarysqa qatysyp, myqtylyǵyn dáleldeýi tıis. Al patrıot el namysyn, ózine senim artqan halqyn oılaýy qajet. Bárinen Koreıa elinen kelgen sportshymen kúresý qıyn boldy. Kóp kúsh jumsaǵanymmen, maqsatyma jetip, jeńis tuǵyrynan kórindim. Aldaǵy ýaqytta Álem chempıonatyna qatysamyn, daıyndyq bastalyp ketti», - dedi sambo kúresinen Azııa chempıony Shyńǵys Shoqpytov.

Al 28 jastaǵy Alekstandr Borısov Fınlıandııa, Mońǵolııa balýandarymen beldesip, Túrikmenstan sportshysyna jol berdi. Azııa chempıonatynyń kúmis júldegeri 25 mamyr kúni Parıjde ótetin Álem chempıonatyna qatysady.

«Biliktiligimdi arttyryp, ári qaraı jattyǵamyn. Álem chempıonatynda esemdi qaıtarǵym keledi», - dedi Alekstandr Borısov.