Aqtóbege kireberis trassa qurylysy nelikten toqtap qalǵany aıtyldy

AQTÓBE. QazAqparat - Aqtóbede Ońtústik aınalma joldyń qurylysyn byltyr aıaqtaýy tıis merdiger jospardy oryndamady. Ákimdik máselege túsinik berdi, dep habarlaıdy QazAqparat tilshisi.

«Ońtústik aınalma» joldy jóndeý jumystary byltyr aıaqtalý kerek edi. Alaıda bas merdiger «KTP» JShS mindetin atqara almady.
«Merdiger salyqqa, jetkizýshilerge qaryz bolyp qalǵan. Bul onyń óz mindetin atqarýǵa kedergi boldy. Bıyl jumystar aýa raıy qolaıly bolǵan kezde, sáýir aıynyń sońy, mamyr aıynyń basynda bastalady. Kúzge deıin asfalt tóselip, jyl sońyna deıin jaıaý júrginshiler joldary men baǵdarsham dabylyn ornatý, jaryqtandyrý jumystary aıaqtalýy tıis»,- dep jetkizdi oblystyq Jolaýshylar kóligi jáne avtomobıl joldary basqarmasynyń basshysy Aıbek Qaıyr.

Jol tósemin qalpyna keltirý jumystary bastalǵan respýblıkalyq mańyzy bar ​ «Aqtóbe-Qandyaǵash» joly «Ońtústik aınalma» jolynyń jalǵasy. Tasjoldyń qazirgi jaǵdaıy júrgizýshilerdiń narazylyǵyn týdyrdy.
«Joba – aýqymdy, úsh jylǵa eseptelgen. Ony jol qurylysy jumystarynyń bir kezeńinde aıaqtaý múmkin emes. Jóndeý jumystary júrgizilip jatqan jolda qys pen kóktemde mundaı jaǵdaılar bolmaı qoımaıdy. Turǵyndar narazy, túsinemiz. Men merdigerlerdiń atynan, óz atymnan oblys turǵyndarynan, kólik júrgizýshilerinen keltirilgen qolaısyzdyqtar úshin keshirim suraımyn. Jer kepken boıda, shamamen, sáýir aıynyń sońynda asfalt tóseýdi bastaımyz. Ázirge ýaqytsha problemalyq jerlerdi kómip, tegisteıtin bolamyz»,- dedi «QazAvtoJol» UK» AQ-nyń Aqtóbedegi oblystyq fılıalynyń dırektory Marat Mahambetov.

Jol qalpyna keltirilgennen keıin tórtjolaqty bolady. Oblys ákimi Ońdasyn Orazalınniń tapsyrmasyna sáıkes, bıylǵy jyldyń kúzinde Aqtóbeden Qandyaǵashqa deıingi aralyqtaǵy eki jolaq qoldanysqa berilýi tıis. Jalpy, Aqtóbe-Qandyaǵash tas jolynyń 11-den 100 shaqyrymǵa deıingi bóligin qalpyna keltirý jumystary 2023 jyly aıaqtalady.