Aqtóbege Dımash Qudaıbergenniń bir top fanaty keledi

AQTÓBE. QazAqparat - Ánshi Dımash Qudaıbergendi kórýge, onyń mektebi, mýzykalyq kolledji jáne otbasymen tanysýǵa birneshe fanklýb jetekshisi keledi. Týrısterdi kútip alý, ornalastyrýǵa Mádenıet jáne sport mınıstrligi, «Qazaq týrızm» ulttyq kompanııasy qarjy bóldi, dep habarlaıdy QazAqparat tilshisi.

«Qazirgi kezde álemniń 100-den astam memleketinde Dımashtyń fanklýby bar. Fantoptardyń jetekshileri Aqtóbege kelýge usynys aıtty. Fanattardyń kelýin, jol shyǵyndaryn Mádenıet jáne sport mınıstrligi janynan qurylǵan «Qazaq týrızm» ulttyq kompanııasy men Aqtóbe ákimdigi óz mindetine aldy»,- dedi Dımash Qudaıbergenniń anasy Sveta Aıtbaeva.

Aıtap aıtqanda, Aqtóbege AQSh, Germanııa, Malaızııa, Japonııa, Polsha, Frantsııa, Indonezııa, Ýkraına, Qytaı men Qazaqstandaǵy fan top jetekshileri keledi. Sonymen qatar, Jańa Zellanııa, Fınlıandııadaǵy fanattar óz erkimen, óz shyǵyndaryn ótep kelýge ázirlenip, jolǵa shyqty.

«Kelýshiler tek Dımashty emes, «Baqytty bala» jobasy aıasynda án shyrqaıtyn ónerpazdardy tyńdaýǵa, ózge de talantty balalarmen tanysýǵa nıetti. Qazaqtyń ulttyq bolmysyn, mádenıeti men tabıǵatyn kórýge qushtar jandar óz usynysyn bergende qonaqjaılylyǵymyzdy tanytýǵa kúsh salamyz. Barlyǵyn qushaq jaıa qarsy alýǵa daıynbyz. Olarǵa arnaıy baǵdarlama jasaldy. Almaty, Astana, Aqtóbe qalalaryn aralaıdy. Úsh qalanyń ákimdigi men «Qazaq týrızm» kompanııasy birigip, arnaıy marshrýt ázirledi. Aqtóbede qalanyń kórikti jerlerin kóredi. Sonymen qatar, Dımash oqyǵan №32 mektep-gımnazııaǵa, mýzykalyq kolledjge baryp, ustazy Marat Áıtimovtyń sheberlik sabaǵyna qatysady. Bári biledi, daıyndyq júrip jatyr»,- dedi Sveta Aıtbaeva.