Aqtóbege áskerı boryshyn óteýge kelgen sarbaz psıhıkalyq ortalyqqa tústi

AQTÓBE. QazAqparat – Aqtóbedegi 66/55 áskerı bóliminde boryshyn ótep júrgen 24 jastaǵy sarbaz qazir oblystyq psıhıkalyq densaýlyq ortalyǵynda em qabyldap jatyr. Keıin ony úıine qaıtarý aktisi toltyrylady, dep habarlaıdy QazAqparat tilshisi.

Qazirgi kezde 66/55 áskerı bóliminde tirkelgen jaǵdaıǵa qatysty jan-jaqty zerdeleý jumysy júrip jatyr.

Minez-qulqy ózgeshe jigit ortalyqta em qabyldaýyn jalǵastyrady.

«66/55 áskerı bóliminiń sarbazy qazir bizde em qabyldap jatyr. Ata-anasynyń aıtýynsha, ol burynnan tuıyq, kópshilik ortany unatpaıdy. Shynymen de jigit ortasymen aralaspaıdy, minez-qulqy ózgeshe. Sondyqtan minez-qulqyna baılanysty úıine qaıtarylsyn dep akt toltyryp beremiz. Ony ǵylymda sotsıofobııa dep ataıdy. Ol sarbaz tipti kópshilikpen birge tamaq ta ishpegen. Ózge aqparatty bere almaımyz. Qupııa bolyp esepteledi»,- dedi Aqtóbe oblystyq psıhıkalyq densaýlyq ortalyq bas dárigeriniń orynbasary G.Ýrazova.

QR Ulttyq ulany «Batys» óńirlik qolbasshylyǵynyń baspasóz qyzmeti osy oqıǵaǵa qatysty túsinik berdi.

Jas jigit áskerı qyzmetke kelgen kúnnen bastap eshkimmen aralaspaǵan, ózgelerden jyraq júrgen.

Ońtústik óńiriniń týmasy ata-anasymen habarlasqan kezde de sózge óte sarań bolǵan. Suraqqa bir sózben ǵana jaýap berip otyrǵan.

«Áskerı bólimdegi psıhologtyń baqylaýy barysynda jaýyngerlik, dene daıyndyǵy sabaqtarynan bas tartyp, áskerı qyzmetke óz erkimen kelmegenin aıtqan. Ári qaraı da áskerı boryshyn ótegisi kelmeıtinin jetkizgen. Suhbat kezinde sarbaz psıhologııalyq aýytqýy bar ekenin aıtyp, ózin psıhıatr dárigerge qaratýyn ótingen. Psıhokorrektsııalyq jumys pen jeke áńgime kezinde áskerı qyzmetshiniń jaǵdaıy jaqsarmady. Osyǵan baılanysty №3 qalalyq emhanasynyń psıhıatryna konsýltatsııaǵa jiberildi. Psıhıatr qarap, áskerı qyzmetshini tekserý jáne emdeý úshin oblystyq psıhıkalyq densaýlyq ortalyǵyna jiberý týraly sheshim qabyldady. Bıyl ol 19 sáýirde «Beıimdelýdiń buzylýy» degen dıagnozben aýrýhanaǵa jatqyzyldy. Sol sátten bastap aýrýhanada em alyp jatyr. Qazirgi tańda áskerı qyzmetke jaramdylyǵyn tekserý úshin áskerı medıtsınalyq komıssııadan ótkizý josparlanyp otyr», - dep habarlady QR Ulttyq ulany «Batys» óńirlik qolbasshylyǵynyń baspasóz qyzmeti.