Aqtóbedegi jol apaty kezinde aman qalǵan balalar oblys ortalyǵyna jetkizildi

AQTÓBE. QazAqparat – Pokrovka-Janajol baǵytyndaǵy jol-kólik apatynda aman qalǵan balalar búgin oblys ortalyǵyna jetkizildi. Kólik ishinde barlyǵy 11 adam bolsa, onyń beseýi kóz jumǵan, dep habarlaıdy QazAqparat tilshisi.

Oqıǵa ótken jeksenbide tirkeldi. Aqtóbe oblystyq polıtsııa departamentiniń habarlaýynsha, Qandyaǵash qalasynan Keńkııaq aýyly baǵytynda «Lada Largus» avtokóligi aýdarylyp qalǵan. Jol-kólik oqıǵasy saldarynan avtokólik quralyn basqarǵan 40 jastaǵy áıel jáne 3 jolaýshy, onyń ishinde bir bala oqıǵa ornynda, taǵy bir jolaýshy Keńkııaq aýrýhanasynda kóz jumdy.

«Keńqııaq aýrýhanasyna jeti adam jetkizilip, onyń bireýi qabyldaý bóliminde kóz jumdy. Al bireýine keshe ota jasaldy. Sol jaqtaǵy dárigerlerdiń aıtýynsha, naýqastyń ishine qan ketken. Al 2016 jáne 2018 jyly týǵan balalar ekinshi jáne úshinshi dárijeli shok alǵan. Qan qysymy turaqty emes. Eki kishkentaıdy oblys ortalyǵyna jiberdik. Qazirgi kezde eki adam ambýlatorııalyq em alý úshin úıine jiberildi. Ekeýi emin jalǵastyrady»,- dedi Temir aýdandyq aýrýhanasynyń bas dárigeri Serjan Janahmetov.

Naýqastardyń kóbi bas-mı jaraqatymen tústi. Dárigerler eki kún boıy baqylaýda ustap, oblys ortalyǵyndaǵy áriptesterimen keńesip otyrdy.

Eske salsaq, tamyz aıynyń ortasynda osy Temir aýdanynda jol apatynan tórt adam kóz jumdy. Ol kezde jeńil jáne júk kóligi soqtyǵysty.

Sonymen birge ákeli-balaly ekeýi de jolda mert boldy.