Aqtóbedegi terakt týraly derekti fılm Mınskidegi festıvalde jeńimpaz atandy
Qazaqstan Respýblıkasy Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ túsirgen «Senim jolynda» derekti fılmi qoǵamymyzdaǵy ózekti máselelerdiń biri - din jolyndaǵy adasýshylyq týraly baıandaıdy. Negizgi epızod - dúıim eldi dúrliktirgen, birneshe adamdardyń ómirin qıyp, 40-qa jýyq jergilikti turǵyndardy jaralaǵan qandy oqıǵa - 2016 jyly maýsymnyń 5-inde bolǵan Aqtóbedegi terakt.
"Festıvaldiń qazylar alqasy úsh fılmdi úzdik dep atady, onyń ishinde bizdiń de fılmimiz bar. Festıvaldiń bas júldesi reseılik «Forsaj» fılmine buıyrdy. «Senim jolynda» fılmin kórermen jaqsy qabyldady. Tipti, keıbireýleri osyndaı jaǵdaılardyń (dinı ekstremızm men terrorızm) Qazaqstan jerinde oryn alǵany týraly estip tań qaldy. Fılm eki jyl buryn jaryq kórdi. Alaıda búgingi kúni osy fılmge qyzyǵýshylyq kóp bolyp jatyr. Festıvaldiń uıymdastyrýshylary fılmniń úzindilerin ǵalamtorda kórip, meni tapqan. Sol úshin de, uıymdastyrýshylarǵa alǵysymdy bildiremin. Jáne de Mınskige birinshi ret kelip otyrmyn, bul da men úshin qýanysh. Aıta ketsem, festıvalge stsenarııdiń teń avtory Mereke Qasenova da shaqyrylǵan bolatyn", - dedi rejısser Ásııa Baıǵojına.
«Eýrazııa.DOC» atty TMD elderiniń derekti kıno festıvali osymen úshinshi ret ótkizilip otyr. Bıyl festıvalge qatysýǵa 23 elden 150 fılmder úmit bildirgen. Onyń ishinen negizgi baıqaýǵa 12 eldiń 24 derekti fılmi irikteldi.
Festıvaldiń basty maqsaty - Dostastyq elderiniń talantty dokýmentalıst-redjısserlerin qoldaý, televızııalyq fılmderdi jáne kınopýblıtsıstıkany jaryqqa shyǵaryp júrgen jas kınogerlerdiń esimin ashý, shyǵarmashylyq baılanystardy nyǵaıtý bolyp tabylady.
Eske sala ketsek, Aqtóbedegi terakt týraly derekti fılm TMD elderiniń festıvaline qatysyp jatqanyn habarlaǵan bolatynbyz.