Aqtóbedegi terakt kezinde qaıtys bolǵan áskerılerdiń týysqandary marqumdar týraly estelikterimen bólisti

AQTÓBE. QazAqparat - Búgin Aqtóbede  maýsymdaǵy terakt kezinde qarýly toppen qaqtyǵysta qaıtys bolǵan áskerılerdiń qurmetine №6655 áskerı bóliminde eskertkish taqta ornatyldy,  dep habarlaıdy QazAqparat tilshisi.

Áskerı bólimde ótken saltanatty jıynǵa terakt kezinde qaza bolǵan maıor Danıel Maılybaev, kishi serjant Berikjan Qalıev pen qatardaǵy jaýynger Dosbol Sapardyń ata-ana, baýyrlary, balalary da qatysty. Olar jaqyndary týraly estelikterimen bólisti.

«Danıel bala kezinen áskerı bolýdy armandady. Óte baýyrmal edi.  Ata-anasy, baýyrlary, jaqyndaryna únemi jany ashyp turatyn. Otbasyn qatty jaqsy kórdi. Aǵamnyń sol kúngi áreketin men erlikke balaımyn. Ol antyna berik ekenin dáleldedi», - deıdi marqum  Danıel Maılybaevtyń inisi Aıan Maılybaev.

 Al tula boıy tuńǵyshynan qapyda kóz jazyp qalǵan Erkinbek Ábdiqadyrov uly Dosboldyń baqılyq bolǵanyna áli sener emes. Qaıǵyly oqıǵadan bir kún buryn anasymen telefon arqyly tildesip, jaǵdaıynyń jaqsy ekenin, áskerı ómirge úırengenin aıtypty.

«Tórtinshi maýsym kúni mamasymen sóılesipti. Tipti, alańdamaýshy edim. Óıtkeni, buǵan deıin áskerı ant qabyldaǵanda kelip, áskerı bólimdi kórdik ǵoı.  Jaǵdaıymen tanyspyz. Sondyqtan, alańsyz boldyq. Jaısyz habardy estirtkende de, senbedik, eseńgirep qaldyq.  Taǵdyrdyń salǵanyna amal bar ma? Áli kúnge sene almaımyn. Qazir bir soldat kórsem, týra balamdy kórgendeı bolam. Sol jeri adamǵa qatty batady. Kóz aldymnan ketpeıdi. Amal joq endi.  Qaıtemin, eli úshin týǵan bala eken...» -deıdi qatardaǵy jaýynger Dosbol Sapardyń ákesi Erkinbek Ábdiqadyrov.

Toǵyzynshy synypta oqıtyn Gúlaına Erenova ákesi Berikjan Qalıevti batyr sanaıdy. Maqtan tutady. Kishi serjant Berikjan Qalıev sol kúni kezekshilikte bolǵan.

«Ákem  - men úshin naǵyz batyr. Meıirimdi adam. Áskerı adam bolǵasyn ba, tártipti óte jaqsy kóretin. Bizdi de soǵan úıretti. Únemi baǵyt-baǵdar berip otyratyn»,- dep eske aldy ákesin Gúlaına Erenova.

Aıta ketsek, osyǵan deıin  podpolkovnık Danıel Maılybaev pen kishi serjant Berikjan Qalıevtiń   «Qazaqstan Respýblıkasynyń Quqyqtyq tártip áskerine - 25 jyl» keýde belgisimen marapattalǵanyn habarlaǵan bolatynbyz.  Marapatty Danıeldiń aǵasy Aıan Aqarysuly jáne Berikjannyń anasy Gúljan Tólenqyzy qabyldap aldy.    

Eske sala keteıik, ótken jyldyń maýsym aıynda qarýlanǵan 18 adam Aqtóbedegi №6655 áskerı bólimine shabýyl jasaǵan edi. Qaqtyǵys kezinde 3 áskerı qyzmetker qaza bolyp, altaýy jaraqattandy.

Zada Zeıin