Aqtóbedegi terakt: Qaza bolǵan áskerı qyzmetshilerdi eske alý sharasy ótti
Aqtóbe qalasynda ornalasqan 6655 áskerı bóliminde búgin terrorlyq shabýyl kezinde qaza bolǵan qyzmetkerlerdi eske alýǵa arnalǵan sambodan respýblıkalyq jarys ótip jatyr. Týrnırge «Ońtústik», «Shyǵys», «Ortalyq», «Batys» óńirlik qolbasshylyǵynyń jáne Astana qalasyndaǵy 5573 áskerı bólimi men QR Ulttyq ulany áskerı ınstıtýtynan 200-den astam sportshy qatysyp jatyr. Sharaǵa 2016 jyldyń 5 maýsymynda bolǵan terrorlyq shabýyl kezinde qaza bolǵan kishi leıtenant Berikjan Qalıevtiń anasy Gúljan Erenova da qatysty.
«Ulym qyzmet etken 6655 áskerı bólimi meniń jylda keletin, eske alatyn ornyma aınaldy. Balamnyń minezi jumsaq, eńbekke adal edi. Kishige qamqor bola bildi. Balasynyń úlkeni 10-synypty bitirdi, kishisi mektep tabaldyryǵyn endi attaıdy. Artynda tórt balasy bar. Bári ákesin maqtan tutady, erligin únemi aıtyp otyramyn», - dedi Gúljan Erenova.
Eske salsaq, Aqtóbedegi 6655 áskerı bóliminde terrorlyq shabýyl kezinde eki áskerı qyzmetshi, bir sarbaz qaza boldy. Olar: maıor Danıel Maılybaev, kishi serjant Berikjan Qalıev jáne sarbaz Dosbol Sapar. Qaza bolǵan soń Danıel Maılybaevqa ІІ dárejeli «Aıbyn», Berikjan Qalıev pen Dosbol Saparǵa ІІІ dárejeli «Aıbyn» ordeni berildi. Al áskerı bólimde qaza bolǵan qyzmetkerlerge arnaıy murajaı ashylyp, eskertkish taqta qoıylǵan bolatyn. Qazirgi kezde áskerı bólimde qaýipsizdik sharasy kúsheıtilip, tehnıka jańartyldy.
«Terrorlyq aktten keıin kóp is atqaryldy. Áskerı qalashyqta qaýipsizdik sharasy kúsheıtilip, qosymsha qaqpa jasaldy. Kún saıyn áskerı bólim terrıtorııasynda terrorızmge qarsy kúres, qorǵanýǵa baǵyttalǵan jaýyngerlik daıyndyq ótedi. Munda barlyq jerde kamera bar ári baqylaý munarasy jóndeldi», - dedi QR Ulttyq ulany «Batys» óńirlik qolbasshysynyń orynbasary Pavel Sıtnıkov.