Aqtóbedegi terakt boıynsha basty sot talqylaýy 24 qazanda ótedi
«Qylmystyq is júrgizý zańynyń 29-baby talaptaryna sáıkes, zardap shegýshilerdiń, kýágerlerdiń jáne protseske basqa da qatysýshylardyń qaýipsizdigin qamtamasyz etý maqsatynda, sonymen qatar memlekettik qupııalardy (rejimdik nysan áskerı bólimge shabýyl epızody boıynsha) qorǵaý múddesine oraı, is boıynsha tyńdaý jabyq túrde ótetin bolady», - delingen Aqtóbe oblystyq soty taratqan aqparatta.
Oǵan súıensek, Aqtóbe oblystyq qylmystyq ister jónindegi mamandandyrylǵan aýdanaralyq sotta 5 maýsymda oryn alǵan lańkestik aktisi boıynsha qylmystyq iske baılanysty aldyn ala tyńdaý ótken. Otyrys Aqtóbe oblystyq qylmystyq ister jónindegi mamandandyrylǵan aýdanaralyq sotynyń tóraǵasy Nurlan Sultanovtyń jetekshiligimen ótti. Onda atalǵan qylmystyq is boıynsha sotqa berilgen 29 sottalýshy, 27 qorǵaýshy men memlekettik aıyptaýshy tyńdalǵan. Kúdiktilerdiń 9-yna birqatar qylmystyq quqyqbuzýshylyq, onyń ishinde terrorıstik akti jasady degen aıyp taǵylǵan. Al 18-i daıyndalyp jatqan qylmys jaıynda aldyn ala aqparat bermedi, al 2-eýi qylmysty jasyrdy degen kúdikke iligip otyr.
Qylmystyq is boıynsha 215 saraptama júrgizildi. Zardap shekkender qatarynda 101 adam bar. Oqıǵa ornynda túsirilgen vıdeojazbalardan málimetter banki quryldy.
Aıta keteıik, aǵymdaǵy jyldyń 5 maýsymynda Aqtóbe qalasynda lańkestik oryn aldy. Bir top lańkes qaladaǵy «Pallada» men «Pantera» qarý-jaraq dúkenderine jáne №6655 áskerı bólimine shabýyl jasaǵan. Sonyń saldarynan 8 adam, onyń ishinde 3 áskerı qyzmetshi qaza tapty. 30 adam, onyń ishinde 14 beıbit turǵyn jaraqattandy.