Aqtóbedegi tarıhı-ólketaný mýzeıinde Táýelsizdik kúnine arnalǵan kórme ashyldy

AQTÓBE. QazAqparat – Aqtóbedegi oblystyq mýzeıde «Táýelsizdik — el tilegi, Elbasy — el tiregi» atty kórme ashyldy. Onda 30 jyldaǵy zertteý jumysynyń tabysy men Elbasy Nursultan Nazarbaevtyń óńirge saparynan foto qoıylǵan, dep habarlaıdy QazAqparat tilshisi.

1991-1999 jyldary aralyǵynda oblysta 206 mádenı nysan bolsa, qazirgi olardyń sany 480-ge jetti. Al 2007-2010 jyldar aralyǵynda 20 klýb pen mádenıet úıi ashyldy. Úsh memorıaldyq keshen salynyp, oblystyq tarıhı-ólkentaý mýzeıi qoldanysqa berildi. Al 2017 jyly Óner ortalyǵy salynyp, ánshi Dımash Qudaıbergenniń qatysýymen «Baqytty bala» baıqaýy ótkizilip keledi. Sonymen birge «Rýhanı jańǵyrý» baǵdarlamasy aıasynda zertteý jumystary júrgizilip, tarıhı eskertkishter qalpyna keltirilip jatyr. El Táýelsizdiginiń 30 jyldyǵyna arnalǵan «Táýelsizdik — el tilegi, Elbasy — el tiregi» atty merekelik keshte oblys ákiminiń orynbasary Bulbul Eleýsinova áleýemttik saladaǵy kórsetkishterge toqtaldy.

«Áleýmettik salada jetken jetistik kóp. 160-tan astam mektep salynyp, oblys turǵyndarynyń 97% sapaly aýyz sýmen qamtamasyz etildi. Qazir turǵyndardyń 90% astamy kógildir otynnyń qyzyǵyn kórip otyr. Mádenıet, ádebıet salasynda da birqatar is tyndyryldy. «Rýhanı jańǵyrý» baǵdarlamasy aıasynda tarıhı eskertkishter zertteldi. Bıyl Shámshi Qaldaıaqov, Tólegen Aıbergenovke eskertkish ornatyldy. Jyl sońyna deıin Ult azattyq jolynda eldiń erkindigi, egemendigi úshin kúresken qaıratkerlerge eskertkish ashý josparda bar», - dedi Bulbul Eleýsinova.

Keıin mádenıet salasynyń bir top qyzmetkeri oblystyń mádenıet jáne óner salasynyń órkendeýi jolynda eleýli úlesi jáne belsendi qyzmeti úshin «Qazaqstan Respýblıkasynyń Táýelsizdigine 30 jyl» mereıtoılyq medalimen,«Mádenıet salasynyń úzdigi» tósbelgisimen marapattady. Ólketanýshy, «Qurmet» ordeniniń ıegeri Bekarystan Myrzabaı da merekelik lebizin bildirdi.